Rama paralajmëron Metën: Lexo rezolutën, mos e trash zullumin

Kryeministri Edi Rama këtë të enjte e ka vijuar fushatën elektorale në qytetin e Librazhdit. Nga ky qytet Rama ka vazhduar atë që tha në parlament paradite, duke i intensifikuar akuzat në drejtim në presidentit, Ilir Meta.

Rama nga Librazhdi ka bërë edhe një paralajmërim për kreun e shtetit, që të mos vazhdojë më këtë ide të tij, duke mos e trashur akoma dhe më shumë zullumin.

Sipas kryeministrit, kreu i shtetit, duhet ta lexojë rezolutën e votuar sot në Kuvend dhe të reflektojë.

“Të reflektojë mbi opinionin e Kuvendit dhe të mos e trashë më tutje zullumin ky është futur, pasi ne dhe populli nuk ka shans të merren peng. E di që ai është në pozitë të vështirë, por nuk është burrëri që të mos reflektojë dhe të kërkojë ndjesë. Më tha Taulanti që Presidenti kishte nxjerrë ca ekspertë që paskan thënë që ai po rishikon mundësinë e një date tjetër dhe deri atëherë kryetarët e bashkive do të rrinë në zyrë. Një tjetër pjellë e një imagjinate të dalë nga kontrolli për të çuar vijën e konfliktit matanë 30 Qershorit, që është vulosur dhe nuk e ndalon dot, as Ilir, as Saliu dhe as artisti me fallxhoren”.- tha Rama