Rama paralajmëron kryebashkiakët: Hiqni dorë, mos merrni veten më qafë

Nisur nga djegia e KZAZ-së së Bushatit, kryeministri Edi Rama iu bën thirrje kryebashkiakëve që të heqin dorë nga veprimet e tilla, ndërsa iu kujton edhe kodin penal për krimet zgjedhore.

Nëpërmjet dy mesazheve në Tëitter, kreu i qeverisë bën të ditur se kryebashkiakët nuk duhet të marrin veten në qafë  për interesat e drejtuesve të partive.

“Çdo kryebashkiak që merret me brava shkollash të caktuara si qendra votimi, në përpjekjen harbute dhe qesharake, për të penguar zgjedhjet me dyer të mbyllura me çelësa marrëzie, bën mirë të lexojë Kodin Penal për krimet zgjedhore e të heqë dorë sa pa rënë në dorën e drejtësisë”, shkruan Rama në mesazhin e parë.

“Askush tjetër përveç katër të marrëve që i udhëheqin, s’u ka faj kryebashkiakëve të opozitës për largimin nga gara zgjedhore, ndaj ata le të merren me hapjen e dyerve të partive përkatëse, jo të marrin në qafë veten e punonjësit e tyre, duke u kthyer në të pandehur për dyert e QV”, vijon kryeministri.