LIGJET E BIZNESIT
Dhënia e lejeve të ndërtimit është shoqëruar me shtim të ndjeshëm të të ardhurave nga bashkitë. Sipas të dhënave të raportit të financave vendore, publikuar nga Coplan dhe Ministria e Financave (www.financatvendore.al), gjatë tremujorit të parë të këtij viti bashkitë në të gjithë vendin rritën të ardhurat nga taksa e ndikimit në infrastrukturë (taksa që paguhet për lejet e ndërtimit) me 58 për qind kundrejt të njëjtës periudhë të një viti më pare. Arsyeja e rritjes së të ardhurave nga ky zë është rritja e ndjeshmeve e lejeve të ndërtimit të dhëna gjatë tre muajve të parë të 2019-ës.
Sipas të dhënave të raportit të financave vendore, në këtë periudhë të ardhurat nga kjo taksë arritën në rreth 2.4 miliardë lekë, me rritje 1.4 miliardë lekë krahasuar me vitin e mëparshëm apo rreth 1.4 herë më e lartë kundrejt të njëjtës periudhë të një viti më parë.
Të hyrat nga taksa e ndikimit në infrastrukturë nga ndërtimet e reja vijojnë të përfaqësojnë një burim të rëndësishëm dhe qenësishëm në buxhetin vendor: në tremujorin e parë të vitit 2019 të ardhurat nga kjo taksë përfaqësuan rreth 68.9% ndaj totalit të të ardhurave nga taksat vendore dhe rreth 44.7% ndaj totalit të të ardhurave nga burimet e veta vendore.
Në rastin e ndërtimeve të destinuara për qëllime banimi apo për njësi tregtimi dhe shërbimi, të cilat kryhen nga shoqëri ndërtimi, shkalla e taksës së ndikimit në infrastrukturë është në masën 4 për qind deri në 8 për qind të çmimit të shitjes për metër katror. Në Bashkinë e Tiranës taksa e ndikimit në infrastrukturë është 8 për qind, ndërsa në bashkitë e tjera 4%.
Analiza e zhvillimit të financave vendore tregon se të ardhurat e larta të grumbulluara nga taksa e ndikimit në infrastrukturë sinjalizojnë për varësi të lartë të buxhetit vendor nga kjo taksë dhe rreziqe të shtuara varësisht natyrës ciklike të saj. Gjithashtu, mund të ndodhë që bashkitë të zhvendosin preferencat për likuiditet në terma afatshkurtër, në kurriz të zhvillimit të qëndrueshëm afatgjatë.
