‘Lufta’ Presidencë-Qeveri, Meta nxjerrë ‘në vijën e parë të betejës’ këshilltarët

Ka vijuar edhe sot ‘beteja’ e nisur prej një jave, Presidencë-Qeveri. Pas rezolutës së mazhorancës të miratuar në Parlament ka ardhur edhe përgjigja e kreut të shtetit.

Këtë herë Meta ka nxjerrë para medieve dy këshilltarët e tij, atë për mediet dhe atë juridik, të cilët kanë dhënë shpjegimet e detajuara të situatës, duke mbështetur qëndrimin se zgjedhjet e 30 qershorit nuk duhet të bëhen.

“Presidenti ka ndjekur me vëmendje të gjitha diskutimet që u zhvilluan sot në parlament, ku u diskutua vendimmarrja për zhdekretimin e 30 Qershorit. Në vend të një reflektimi dhe në vend që të ishte një moment ku mund të shfaqej një reflektim apo ku mund të diskutohej për zgjidhjen e krizës, sot u lëshuan lumenj fyerjesh ndaj institucionit të Presidentit. Kjo retorikë nuk i shërben zgjidhjes së krizës dhe paqes sociale. Presidenti thekson para shqiptarëve dhe partnerëve se dekreti për shfuqizimin u mor në mbështetje me dispozitat Kushtetuese. Ky akt është marrë bazuar te argumentet Kushtetuese. Ai është në fuqi dhe i detyrueshëm për zbatim nga të gjithë. KQZ është e detyruar ta zbatojë, çdo vendim tjetër është i patolerueshëm nga ligji. Çdo parti që e kundërshton është e lirë të ngrejë pretendimet në gjykatën Kushtetuese apo tjetër që vlerëson se mund të zgjidhë çështjen”.