Lëvizje bllok e bashkive të Opozitës, bëjnë kërkesën befasuese

Bashkia e Kukësit nis zbatimin e dekretit të Presidentit Meta i cili anuloi datën 30 qershor për zhvillimin e zgjedhjeve vendore.

Kërkesa është bërë me datë 14 qershor 2019 dhe i është drejtuar Komisionit të Zonës së Administrimit Zgjedhor nr.11.

Kërkohet heqja e listave të zgjedhësve të afishuara në institucionet arsimore si dhe lirimin e ambienteve nga KZAZ.

“Bashkia i kërkon lirimin e menjëhershëm të ambienteve të KZAZ-së, nr 11, pranë qendrës kulturore “Hasan Prishtina” si dhe të palestrës sportive të Shkollës së Mesme të Përgjithshme “Havzi Nela  në Kukës. Gjithashtu kërkohet heqja e listës përfundimtare të zgjedhjeve të publikuara dhe të afishuar në institucionet arsimore parashkollore dhe parauniversitare (çerdhe/kopshte/ Shkolla/ në administrimin dhe pronësi të Bashkisë së Kukësit” 

Kërkesa që i është bërë KZAZ është edhe për të liruar ambientet. Gjithashtu për dijeni i dërgohet KQZ-së, Presidentit, kryeministrit, ministrit të Brendshëm dhe prefektit të qarkut.

Të njëjtën rrugë mesohet se do të ndjekin dhe të gjitha bashkitë e tjera në vend ku kanë bërë po të njëjtën kërkesë në KQZ që të njihet dekreti i Presidentit të Republikës Ilir Meta dhe të mos zhvillohen zgjedhjet vendore të 30 qershorit.