Ku fle lepuri? Rama e zbulon në Divjakë…

Kryeministri Rama në Divjakë i është rikthyer fushatës pas dy ditëve takime jashtë vendit, por njëkohësisht edhe sulmeve ndaj Opozitës dhe presidentit, Ilir Meta.

Kreu i qeverisë ka thënë se me atë që bëri Meta, u mësua se ku fle lepuri. Sipas Ramës frika ndaj zgjedhjeve është motivi kryesor që e ka shtyrë Metën drejt marrjes së atij vendimi shumë të guximshëm.

“Do të kishim dëshiruar që këtë fushatë ta kishim garë me kundërshtarët tanë për të parë idetë dhe kandidatët më të mirë, por fatkeqësisht nuk ka ndodhur kështu, pasi kanë kapitulluar para se të fillojë ndeshja. Nuk përballen dot me ne në zgjedhje, kanë frikë nga gjykimi i njerëzve dhe të maten me ne duke bërë atë që politika duhet të bëjë dhe jo duke sharë dhe shpifur dhe kërcënuar. Frika nga zgjedhjet dhe tmerri nga reforma në drejtësi dhe paniku ka bërë që të kthehen në një front kundër celjes së negociatave. Nesër do të flasim më shumë, por akti i fundit i Metës e ka zbardhur plotësisht planin dhe na ka dhënë të kuptojmë se ku fle tamam lepuri. Sigurisht që ne kemi bërë shumë por në asnjë mënyrë sa do të donim” tha Rama.