Grupi i Emiliano Shullazit letër institucioneve të Vetingut: Të merren masa ndaj gjyqtares Saida Dollani

Grupi i Emiliano Shullazit i ka dërguar sot një letër dy institucioneve të Vettingut: Komisionit të Pavarur të Kualifikimit dhe Operacionit Ndërkombëtar të Monitorimit ku kërkojnë shkarkimin e gjyqtares Saida Dollani.

Në letrën e firmosur nga Emiliano Shullazi, Blerim Shullazi, Endrit Zela dhe Gilmando Dani thuhet se Gjyqtarja e Krimeve të Rënda ka shkelur në mënyrë flagrantë të drejtën themelore të mbrojtjes nga një avokat.

“Me veprimet e saj insistuese përtej arsyes dhe kërkesës së ligjit, gjyqtarja ka krijuar dyshime thelbësore se motivimi i saj nuk është thjeshtë kryerja e detyrës, por marrja e një pozicioni “heroiko-stoik”, duke synuar të jetë me çdo kusht gjyqtarë në këtë çështje, ku të pandehurit gjerësisht dhe në cenim të parimit të prezumimit të pafajësisë janë stigmatizuar tashmë si element me ngarkesë të fortë kriminale.

Mesa duket gjyqtarja në fjalë, në një kohë kur është në pritje të përfshihet në procedurat e vetingut, synon të marrë “merita” shtesë, apo të kompensojë mangësi të tjera, duke marrë flamurin e deklarimit fajtor dhe dënimit përfundimtar të të pandehurve në këtë çështje. Çka na krijon dyshime serioze se ajo jo vetëm ka paragjykuar çështjen, por e ka paragjykuar atë në kurriz të të pandehurve e të drejtave të tyre për një proces të drejtë dhe të rregullt ligjit”, thuhet ndër të tjera në letër.