Ana tjetër e Elisa Spiropalit, reciton në Kuvend vargjet për Haxhi Qamilin

Ministrja për Marrëdhënien me Parlamentin, Elisa Spiropali gjatë fjalës së saj në Kuvend është shprehur se Presidenti Meta ka shkelur rëndë parimet kushtetuese me aktin që ka ndërmarrë për anulimin e zgjedhjeve vendore të 30 qershorit.

Spiropali ka thënë se kjo situatë ngjan me lëvizjen e Shqipërisë së Mesme që udhëhiqej nga Haxhi Qamili, në vitin 1914 ku në Shqipëri mbretëronte Princ Vidi.

FJALA E ELISA SPIROPALIT

Akti i Ilir Metës është një atentat i pastër kushtetues që sulmon Republikën ku cenon rëndë të drejtën e zgjedhjes së shtetasve. Këta janë mësuar të bëjnë me Kushtetutën, ligjin dhe shqiptarët s’i kanë dashur. Më 30 qershor do të përballen me murin e lartë të ligjit ku do të thyejnë hundët.

Ilir Meta shkeli parimin e unitetit kombëtar. Me vendimin e tij, Ilir Meta dëshmoi se mund të nxjerrësh Presidentin nga kulla e LSI-së, por nuk mund të shkulësh LSI-në nga zyrat më të larta të shtetit. Shkeli parimin e sovranitetit të popullit. Presidenti u zgjati mandatin tej kushtetues.

Ai tenton ta justifikojë aktin e tij duke thënë se synon të shmangë përplasjen civile. Cilën përplasje civile? Atë që e ideon në shpi dhe parti? Atë që e ideon me mikun e tij Sali Berishën dhe Lulzim Bashën.

“Krisi pushka e gjëmoi moti
Kujton austriaku se u bë qiameti,
Nuk është kiamet po është murtanë,
Vjen Kavaja me gjithë Tiranë
Gajret çuna dhe ju faltë Zoti,
se Princ Vidin se zë moti.
Se Princ Vidin se zë moti,
kemi lejnun o prej baroti
Mal mbi mal këndon bilbili
Trim mbi trima Haxhi Qamili
Haxhi baba me vegjëli, qiti vidin me 12 mij”.

Kjo lëvizje e cila ngjan kryekëput me këtë, sigurisht që nuk mund të përsëritet.