Aktivitet i paligjshëm në mes të Bllokut, policia arreston 2 persona

Policia e Tiranës ka proceduar penalisht 2 persona për vënie në dispozicion të ambjenteve për lojëra fati të palejuara.

Gjatë këtij operacioni uniformat blu kanë sekuestruar tavolina pokeri, çelësa automjetesh, telefona të fundi dhe kompjutera të ndryshme, që u gjetën në ambjentet e dy personave të proceduar në rrugën Ismail Qemali, në zonën e Ish-Bllokut dhe në rrugën Irfan Tomini ne kryeqytet.

Njoftimi i policisë Tiranë

Finalizohet operacioni “Poker”

Goditen dy raste të aktivitetit të kundërligjshëm të lojërave të fatit.

Operacioni nga Komisariati i Policisë nr 2.

Procedohen penalisht 2 shtetas për veprën penale “Vënia në dispozicion e lokaleve për lojëra të palejuara”.

Sekuestrohet në cilësinë e provës materiale një tavolinë pokeri, kompjuter, monitor, aparate celularë, bizhuteri, çelësa mjetesh dhe vlera monetare.

Shërbimet e Policisë të Komisariatit Nr. 2, në bazë të informacioneve të marra në rrugë operative se në dy lokale të ndryshme zhvillohej në mënyrë të kundërligjshme aktiviteti i lojërave të fatit, organizuan dhe finalizuan operacionin e koduar “Poker”, ku si rezultat u proceduan penalisht shtetasit:

– R. N.,32 vjeç, banues në Tiranë.

– A. S., 55 vjeç, banues në Tiranë.

Gjatë kontrollit të ushtruar në rrugën “Irfan Tomini” dhe në rrugën “Ismail Qemali”,  në lokalet nën administrimin e këtyre shtetasve, Policia gjeti dhe sekuestroi në cilësinë e provës materiale një tavolinë pokeri, kompjuter, monitor, aparate celularë, bizhuteri, çelësa mjetesh, si dhe vlera monetare.

Kontrollet kundër aktivitetit të paligjshëm të lojërave të fatit do të vijojnë në gjithë qarkun Tiranë, me qëllim parandalimin, evidentimin dhe ndëshkimin e këtij aktiviteti të kundërligjshëm.

Policia e Shtetit fton qytetarët që të denoncojnë në numrin 112 ose përmes aplikacionit “Komisariati Dixhital”, çdo veprimtari të tillë të kundërligjshme.