Aksident tragjik në Tiranë, shuhet familja me 4 anëtarë

Një aksident i rëndë ka ndodhur mbrëmjen e djeshme në aksin rrugor Tiranë- Elbasan afër rrethrrotullimit të TEG-ut, ku si pasojë e përplasjes kanë humbur jetën 4 anëtarë të një familjeje.

Viktimat janë kryefamiljari B.Bibaj, 58-vjeç, bashkëshortja e tij F.Bibaj dhe dy vajzat Valentina dhe Xhuliana Bibaj, ndërsa drejtuesi i mjetit Arlind Aliaj i cili ishte dhe miku i familjes ndodhet në gjendje të rëndë shëndetësore në Spitalin Ushtarak.

Mësohet se familja ishte duke u kthyer nga qyteti i Elbasanit ku po festonin ditëlindjen e njërës prej vajzave.

Shkak i aksidentit mendohet të ketë qenë shpejtësia e lartë e automjetit.

Në momentin e aksidentit, zona nuk ka pasur prezencë të automjeteve të tjera duke bërë të pamundur dhënien e ndihmës së parë mjekësore për personat e aksidentuar.

Njoftimi i policisë: 

Në aksin rrugor Elbasan-Tiranë, në afërsi të TEG-ut, mjeti me drejtues shtetasin  A. A ka humbur kontrollin dhe ka dalë nga rruga  duke u përplasur me bordurën e rrugës.

Si pasojë e përplasjes kanë ndërruar jetë pasagjerët V. B, B. B, F., B, Xh.B., ndërsa drejtuesi i mjetit A. A ndodhet në SQU nën kujdesin mjekësor.

Grupi hetimor vijon punën për zbardhjen e rrethanave dhe shkakut të aksidentit.