LIGJET E BIZNESIT
Sigal Uniqa Group Austria, kompania lider në tregun e sigurimeve ka festuar 20-vjetorin e themelimit. Përvjetori i investitorit të parë strategjik në industrinë e sigurimeve ka mbledhur bashkë në një mbrëmje madhështore qindra të ftuar e personalitete të fushave të ndryshme.
Për themeluesin dhe drejtorin e kompanisë, Avni Ponari, ky ka qenë një rrugëtim i gjatë, i kurorëzuar me sukses me besimin e fituar të klientëve.
“Rrugëtimi 20-vjeçar, që nga 1999 kur ne themeluam Sigalin dhe ishim vetëm 5 veta dhe kishim kapitalin vetëm 400 mijë USD, e deri më sot ku jemi mbi 1500 persona dhe një capital mbi 35 milionë euro, ka qenë një rrugëtim i gjatë, i lodhshëm, me shumë sfida por edhe i bukur kur shikon se sa shumë besim u kemi dhënë shqiptarëve kudo në Ballkan dhe këtë e vërteton edhe prania juaj sonte.
Dua të falenderoj në mënyrë të veçantë klientët, që janë me qindra-mijëra në Shqipëri, Kosovë e Maqedoni, të cilët kanë besuar e vazhdojnë të na besojnë”, u shpreh Ponari.
Rrugëtimin e kompanisë në tregun shqiptar të sigurimeve e vlerësoi edhe Andreas Brnadstetter, CEO i Sigal Uniqa Group.
“20 vjet më parë Sigal Uniqa nuk ekzistonte, s’ishte aty fare.
Së bashku me një grup të vogël prej disa njerëzish ju vendosët të ngrini një kompani nga hiçi, që sot është grupi i sigurimeve më i madh në Shqipëri, Kosovë dhe Maqedoninë e Veriut që mbështet miliona klientë për të bërë dhe për të pasur një jetë më të mirë, më të gjatë dhe më të sigurt”, deklaroi ai.
Por, mbrëmja gala ka dhuruar akoma më shumë emocione, veçanërisht për “kapitenin e anijes”, themeluesin e kompanisë, Avni Ponarin, i cili u nderua nga Austria me dekoratën “Grand Decoration of Honour.”
“Jam i prekur nga nderimi i Presidentit të Republikës së Austrisë, Shkëlqesia e tij, Z.Alexander Van der Ballen, që më akordoi medaljen “Grand Decoration of Honour” dhe prania juaj sonte në këtë even të rëndësishëm më bën të ndjehem krenar dhe më i përkushtuar”, deklaroi Ponari.
Me më shumë se 121 milionë euro asete, punonjësit e Sigal Uniqa Group, të vetmes kompani e cila ofron të gjitha klasat e sigurimit përmes 900 zyrave me përkushtim e e profesionalizëm u shërbejnë mbi 1 milionë klientëve në Shqipëri, Kosovë e Maqedoni.
