Këtë të premte u mbajt në Tiranë Konferencën e Tretë Kombëtare të Industrisë së Bimëve Mjekësore dhe Aromatike. Me fokus në kultivimin e bimëve mjekësore e aromatike dhe rritjen e cilësisë, si garanci për rritjen e punësimit dhe eksporteve, kjo konferencë bëri bashkë anëtarët e shoqatës, presidentin Ilir Meta dhe zv.ministrin e Bujqësisë, Dhimitër Kote.
Filip Gjoka, presidenti i Shoqatës, theksoi rëndësinë e bashkëpunimit dhe konsolidimit të industrisë së bimëve mjekësore dhe aromatike, me qëllim krijimin e një zëri të vetëm në mbështetje të kësaj industrie dhe të punësimit në të.
Në përshëndetjen e tij, kreu i shtetit, Meta foli mbi rëndësinë që ka ky sektor për ekonominë shqiptare në tërësi dhe për individët, të cilët punojnë në të. Ai përgëzoi Shoqatën IBMA për arritjen e konsolidimit të industrisë në tërësi dhe cilësoi se një qasje e tillë e forcon industrinë dhe ndihmon rritjen e saj, duke sjellë më shumë përfitime për të gjithë.
Më tej në fjalën e tij, Zv/Ministri i Bujqësisë z. Dhimitër Kote realizoi një bashkëbisedim me pjesëmarrësit, duke ju dhënë përgjigje shqetësimeve të ngritura nga anëtarët e shoqatës IBMA.
Konferenca nxori në pah problematikat kryesore të sektorit dhe industrisë së tij, si dhe përcaktoi objektivat e Shoqatës dhe të mbarë industrisë, si:
1.Fokusimi në trajnime për garantimin e cilësisë së produktit, si rruga e vetme për një rritje të qëndrueshme të eksporteve.
2. Orientimi i fermerëve në kultivimin e bimeve të cilat kanë garanci tregu.
3.Sigurimi i aksesit në tregjet ndërkombëtare, me qëllim rritjen e eksportit te bimëve mjekësore dhe aromatike.
4.Sigurimi i pjesëmarrjes në trajnime brenda dhe jashtë vendit për çështje që lidhen me standartet, cilësinë, sigurinë, metodat e kultivimit dhe prodhimit të bimëve mjekësore dhe aromatike.
5.Sigurimi i financimeve nga donatorë të huaj ose shteti në lidhje me investimet për teknologjinë e përpunimit të bimëve mjekësore dhe aromatike, subvencionimeve për kultivimin e tyre me qëllim rritjen e kapaciteteve prodhuese, financime për pjesëmarrje në panaire të ndryshme brenda dhe jashtë vendit si dhe në organizimin e tureve familjarizuese me qëllim njohjen nga afër të kompanive që operojnë në këtë fushë.
6.Monitorimi i politikave shtetërore që prekin industrinë e bimëve mjekësore dhe aromatike, si dhe propozimi i përmirësimeve që ndikojnë në mbarëvajtjen dhe krijimin e lehtësirave në këtë fushë.
Në fund Konferenca i dërgoi një Memorandum Kryeministrit Edi Rama, me kërkesa për zhvillimin e qëndrueshëm të sektorit, ndër të cilat të ulet taksa vjetore për magazinat dhe ambientet që grumbullojnë, përpunojnë dhe eksportojnë bimët mjekësore dhe aromatike, te shkurtohen procedurat e lejeve të ndërtimit për ato subjekte që duan te ndërtojnë magazina për tharjen dhe ruajtjen e bimëve mjekësore, si dhe taksa e lejes së ndërtimit të mos jetë më shumë se 100 lekë për metër katror, pasi sot llogaritet si të ishte apartament apo lokal.
Sektori i bimëve mjekësore dhe aromatike ka një impakt të rëndësishëm në ekonominë shqiptare me rreth 45 milionë dollarë eksporte në vit dhe 85.000 individë të punësuar kryesisht nga zonat e thella malore dhe rurale, duke ndikuar ndjeshëm në uljen e papunësisë.
