Zgjedhjet e 30 qershorit/ PD-LSI nxitojnë për listat e komisionerëve

Nuk do të jenë pjesë e zgjedhjeve vendore, por kanë nxituar të dorëzojnë listat e komisionerëve për në qendrat e votimit. Kjo ka ndodhur me degët lokale të Partisë Demokratike dhe LSI-së, opozitës së bashkuar që ka deklaruar bojkotin e zgjedhjeve dhe ka dalë në rrugë në protesta.

Duke qenë se 31 maji është afati i fundit për regjistrimin e komisionerëve, opozita e bashkuar jo parlamentare ka respektuar afatin.

Disa KZAZ nuk kanë pranuar fare që të marrin në dorëzim listat e PD dhe LSI, ndërsa disa të tjera, si në Shkodër, Selenicë apo edhe në Korçë i kanë pranuar listat e dorëzuara nga PD dhe LSI, por ende nuk janë shprehur me vendim nëse do t’i pranojnë kandidatët e opozitës si komisionerë të qendrave të votimit.

Ndërkohë, Komisioni Qendror i Zgjedhjeve, më herët, nuk pranoi të regjistronte anëtarët e opozitës në KZAZ, për sa kohë ato nuk janë regjistruar si subjekte politike në zgjedhjet e 30 qershorit.