Pas mbledhjes së Kryesisë së Partisë Socialiste, kryeministri Edi Rama është ndalur të flasë për mediet. Në fjalën e tij kreu i PS njëherësh kryeministër i vendit ka thënë se vendi është në një moment të pazakontë, por se janë të gjitha shanset që kjo gjë të kthehet në një situatë të re politikë për vendin.
Për Ramën ata që nuk duan të shkojnë në zgjedhje kanë të drejtën e tyre për të ndenjur në shtëpi, por nuk mund të pengojë palën tjetër që do të shkojë në zgjedhje më 30 qershor.
“Është një moment i pazakontë por ka gjithë potencialin e vet për të krijuar një situatë të re politike”, theksoi Edi Rama pas mbledhjes së Kryesisë së PS-së. “Në një palë zgjedhje të gjithë duhet të kenë të drejtën të zgjedhin dhe po ashtu kanë të drejtën të mos zgjedhin, të rrinë në shtëpi. Mbi bazën e atij besimi vazhdon funksionimi normal i sistemit demokratik. Ata që nuk marrin pjesë në zgjedhje, ua lënë të tjerëve. Në një demokraci zgjedhjet i bëjnë standardet, që janë të garantuara dhe sigurisht të përmirësueshme”,- u shpreh kryeministri.
