Vdekja e ushtarakes shqiptare, në Letoni nisin hetimet për shpërthimin

Shpërthimi i minës që i mori jetën ushtarakes shqiptare, Zarife Hasani, ka sjellë reagimin e të gjithë aktorëve politik në Shqipëri. Por edhe autoritetet e Letonisë dhe ato të NATO-s kanë reaguar për këtë ngjarje, duke e cilësuar si një aksident tragjik.

Përmes një konference për shtyp NATO, tha se është ende e paqartë, situata në të cilën ka ndodhur shpërthimi dhe shtoi se po bëhen hetime për të zbuluar rrethanat që shkaktuan ngjarjen e rëndë. Komandanti i Forcave të Armatosura Kombëtare në Letoni, Leonid Kalnins tha se situata se rrethanat e shpërthimit të minës janë ende të paqarta, por në bazë kishin filluar inspektimet duke ndërprerë të gjitha trajnimet.
“Kam urdhëruar një inspektim të plotë në bazë për të gjetur mina ende të pashkelura, deri atëherë nuk do të ketë trajnim”, u shpreh komandant Kalnins.

Nëntetarja Zarife Hasani humbi jetën këtë të hënë në një mision të NATO-s, ku ndodhej si pjesë e Forcave të Armatosura, që prej dhjetorit të vitit 2018. Bashkë me të, janë plagosur majori Klodian Tanushi dhe rreshteri Julian Kapaj, ku po trajtohen nga mjekët. Mësohet se njëri prej ushtarakëve është në gjendje të rëndë për jetën.