“Tryezë për krizën politike”/ Rama ironizon presidentin Meta: Ia qaj hallin, nuk do doja të isha në vendin e tij

Kryeministri Edi Rama ndodhet ende në takimin me gazetarët në kryeministri.

Teksa ka folur gjatë për protestën e djeshme të opozitës, është pyetur dhe për krizën dhe tryezën politike që është përfolur për ta thirrur presidenti Ilir Meta.

Rama ka ironizuar Metën duke thënë se ia kupton hallin kur bie fjala për protestën e opozitës dhe se nuk do të donte të ishte në vend të tij.

“Për sa i përket Presidentit të Republikës, në kohë protestash unë ia qaj hallin, shoqërisht, miqësisht, politikisht nuk mund të them se është jashtë kapaciteteve të mia për ta kuptuar situatën. Por ia qaj hallin, nuk do doja kurrë të isha në vendin e tij, është në hall shumë të madh. Për këtë arsye mendoj se ka shumë të drejtë që nuk më ka thirrur për këtë çështje. E mirëkuptoj presidentin me gjithë ato që kanë ndodhur, mbetem i solidarizuar me presidentin sa herë mendoj protesta e opozitës’, tha Rama.