Tabelat në greqisht në jug të vendit, që u hoqën pak ditë më parë do të rivendosen. Kryeministri Edi Rama ka deklaruar se tabelat u hoqën, pasi ishin jashtë kritereve dhe se deri të premten do të rivendosen nga Autoriteti Rrugor Shqiptar në bazë të legjislacionit tonë.
Kryeministri iu ktheu përgjigje edhe atyre që kritikuan tabelat në greqisht. Rama iu kujtoi kushtetutën dhe kanunin, duke treguar edhe qëllimin e vërtetë, atë të sigurimit të votave nëpërmjet një politike të tillë.
“Të gjithë atyre që bëjnë patriotin, apo ultra atdhetarin duke vënë kujën sepse në një zonë ku jeton minoriteti ka tabela ku shkruhet dhe greqisht u them se ne jemi një vend europian dhe kur flasim për Europën flasim edhe për këtë.
Përveç se për traditën tonë të respektit reciprok dhe të trajtimit të barabartë të kujtdo, pavarësisht kombësisë që jeton në këtë shtëpi. Kush do të bëjë vota dhe propagandë më këtë lloj politike le të vazhdojë, por kur nuk do të arrijë të kthejë mbrapsht rrugën e një tradite që është e shënuar që në kanunin tonë dhe është e shënuar në Kushtetutën tonë.
U tha, ç’nuk u tha këtej, u pasua andej gjithmonë nga zërat dhe burimet që kërkojnë sherr, ndërkohë që është shumë e thjeshtë. Tabelat nuk u hoqën sepse kishin lidhje me minoritetin por se ishin jashtë kritereve teknike dhe pa marrë parasysh parametrat e sigurisë, duke shmangur nevojën e një leje që do evitonte këto. Nuk u hoqën për të mos u vënë më. Nesër do të fillojnë të vendosen dhe deri të premten do jenë të vendosura të gjitha nga ARRSH mbi bazën e legjislacionit në fuqi”, u shpreh kreu i qeverisë.
Këto deklarata u bënë gjatë prezantimit të aplikacionit “Ambasada ime”.
