Një supergrabitje ka ndodhur në qytetin e Patosit në orët e para të së dielës. Pre e grabitjes ka rënë një biznes, që tregton materiale ndërtimi, ku rreth orës 03:00, grabitësit kanë marrë një shumë të konsiderueshme parash dhe dy automjete të shtrenjta që klasifikohen si automjete luksi “Audi” dhe “Land Rover”.
Pronari i subjektit “Albstar”, Medi Kurteshi, ka treguar se autorët kanë marrë gjithashtu 2800 euro dhe 60 000 lekë të rinj. Ndërkohë, në subjekt janë shkaktuar edhe dëme të shumta materiale.
Menjëherë pas ngjarjes, Kurteshi ka bërë denoncimin në Polici, duke sqaruar se nuk ka asnjë ide se cilët mund të jenë autorët e grabitjes. Sipas dyshimeve të para, mësohet se autorët mund të kenë qenë të paktën tre persona.
Në një intervistë me mediat, vetë Kurteshi ka treguar se autorët kanë hyrë, duke vjedhur e shkatërruar gjithçka, ndërkohë që kamerat e sigurisë kanë qenë jashtë funksionit.
Kur e patë që ju kishin grabitur dhe dëmtuar zyrat?
Ka ndodhur rreth orës 3 të mëngjesit. Në këto ambiente erdhën disa grabitës dhe u futën brenda mjediseve të punës dhe kanë shkatërruar gjithçka. Kanë shkatërruar dhe kasafortën, në të cilën ndodheshin vlera monetare dhe dy çelësat e makinave që sa i kishim blerë. Rreth orës 3:20 këta i kanë marrë makinat. Në mëngjes ishte çdo gjë e shkatërruar. Rreth orës 3 dëgjova ca zhurma, por nuk dyshova. Kjo nuk është hera e parë, por jo të kësaj natyre. Kjo punë ka qenë e mirorganizuar, por nuk mund të flas me emra konkretë. Mendoj se kanë qenë mbi dy persona.
A keni pasur kamera sigurie? Janë regjistruar lëvizjet?
Kemi kamera sigurie, por nuk kanë funksionuar, pasi kanë qenë të hequra nga priza. Ne kërkojmë të gjenden grabitësit dhe të na kthehen sendet e vjedhura.
A keni dyshime për autorët e mundshëm që mund të kenë pasur dijeni se ku i mbanit gjërat?
Jo, familja ime nuk ka asnjë konflikt dhe nuk dyshoj tek askush. Në këto kushte jemi të frikësuar, jemi të pambrojtur. Nuk ka siguri. Vetë këto ngjarje që më ndodhën, na bëjnë të frikësohemi edhe pse nuk kemi konflikte me askënd./panorama
