Policia e Tiranës ka arrestuar mbrëmjen e së shtunës dy persona të shpallur në kërkim për plagosjen e një të riu në zonën e Kopshtit Botanik.
Burme nga policia bëjnë me dije se dy të arrestuarit janë Dritan Ruçi 45 vjeç dhe Gentian Molla 38 vjeç, të dy nga Mirdita. Ngjarja për të cilën ata akuzohen ka ndodhur më 9 maj, ku fillimisht është raportuar për të shtëna me armë zjarri. Por Policia e kryeqytetit tha se të dyshuarit kishin qëlluar me armë zjarri në ajër, ndërsa personi që u gjet i dëmtuar në vendngjarje ishte plagosur me sende të forta.
Dyshohet se ai është goditur me tytën e armës dhe me grushte e sende të tjera. Shtetasi me iniciale G.H., që mbeti i plagosur rëndë, u transportua në spital për ndihmë mjekësore, ku për disa ditë me radhë qëndroi në terapi intensive. Ndërsa Policia tha se ngjarja kishte ndodhur pas një konflikti të çastit mes tre personave, 2 autorëve dhe të dëmtuarit.
ARRESTIMI
Policia e Tiranës tha dje se nga ana e Patrullave të Përgjithshme dhe Specialistëve për Hetimin e Krimit në Komisariatin e Policisë Nr.1 është bërë kapja dhe ndalimi i shtetasve Dritan Ruçi 45 vjeç dhe Gentian Molla 38 vjeç. Ata ishin të shpallur në kërkim për veprat penale “Plagoje e rëndë me dashje e kryer në bashkëpunim” dhe “Mbajtje pa leje dhe prodhimi i armëve, armëve shpërthyese dhe i municionit”.
Në njoftimin zyrtar, Policia tha se këta dy persona, në bashkëpunim me njëri-tjetrin, më datë 09.05.2019, mbi kopshtin Botanik në Tiranë, kanë qëlluar me armë zjarri në ajër dhe më pas kanë goditur me sende të forta në kokë dhe trup, duke e plagosur rëndë shtetasin G.H.. Menjëherë pas ngjarjes, ata janë larguar me një mjet dhe janë identifikuar disa ditë më vonë kur është bërë edhe shpallja e tyre në kërkim, derisa u arrit arrestimi pasditen e së shtunës.
NGJARJA
Pasditen e datës 9 maj, disa dëshmitarë i telefonuan sallës operative të Policisë së Tiranës, se kishin dëgjuar të shtëna me armë zjarri në afërsi të Kopshtit Botanik dhe kishin parë një person të gjakosur në rrugë.
Ngjarja kishte ndodhur në afërsi të zonës së njohur si “Xhamia”, por Policia tha se nuk kishte plagosje me armë, duke saktësuar se një person ishte dëmtuar me sende të forta, si pasojë e një konflikti të çastit. Megjithatë, nuk dha më shumë detaje rreth asaj që kishte ndodhur.
