Kombëtarja shqiptare vijon të përgatitet intensivisht për dy ndeshjet e radhës eliminatore të kampionatit europian, 2020.
Në ditën e dytë të grumbullimit të kombëtares para medieve kanë dalë sulmuesi Armando Sadiku dhe mbrojtësi Ardian Ismaljli. I kthyer në një nga pikat më të forta të kombëtares kuqezi, mbrojtësi 22-vjeccar është shprehur shumë i kënaqur për atmosferën që mbizotëron në ekip në këtë grumbullim të parë me Edi Rejan trajner. Sipas mbrojtësit që luan në kampionatin kroat kjo ndeshje e parë me Islandën do të jetë vendimtare në lidhje me fatin e këtyre eliminatoreve për ekipin kuqezi.
“Nëse arrijmë të marrim tre pikë në Islandën kemi shumë shanse, pasi e kemi Moldavinë në shtëpi sepse jemi pak më të fortë se ata dhe do arrinim në 9 pikë pas 4 ndeshjeve dhe do kishim shanse të mëdha për kualifikim. Varet dhe nga loja se si do të shkojë në këtë ndeshje të parë.”- tha Ismajli.
Ndërsa Armando Sadiku ka theksuar gjatë konferencës se e vlerëson shumë atmosferën që ka krijuar në kombëtare trajneri i ri, Edi Reja. Sipas futbollistit elbasanas, trajneri italian e bën çdo lojtar të ndihet i rëndësishëm.
“Ka qenë një ndryshim brezi në Kombëtare që nga Europiani i Francës, kanë ardhur prurje të reja në ekip. Shumë lojtarë kanë pasur probleme me klubet e tyre. Më shumë se gjysma nuk kanë luajtur, pastaj me rregullat e Panuçit nuk krijuam raport të mirë.”- tha Sadiku.
