Disa ditë pas vdekjes së fëmiijës 4-vjeçar shqiptar në Zvicër, babai i tij, Asman M, ka folur për humbjen e djalit të tij të vetëm, Zenelit.
Në një intervistë për median zvicerane ”Blick.ch”, babai i 4-vjeçarit që u gjet i mbytur në lumin e qytetit ka folur lidhur me gjendjen e keqe shpirtërore në të cilën ndodhet.
Për t’i ndenjur pranë dhe për ta ngushëlluar në këto momente të këqija në shtëpinë e tij në Zvicër kanë shkuar të afërmit e tij.
“Kanë ardhur edhe enkas për të më ngushëlluar”- u shpreh babai i pikëlluar.
Edhe pse në një gjendje të keqe, Asmani ka kërkuar nga autoritetet vendase vendosjen e një gardhi në vendin ku rrëshqiti djali i tij, në mënyrë që ngjarje të tilla të mos përsëriteshin më.
“Është vend shumë i rrezikshëm. Nuk dua të dëgjoj më që ndonjë fëmijë tjetër të pësojë atë që pësoi im bir”-shtoi babai i Zenelit.
Ndërkohë trupi i pajetë i vogëlushit 4-vjeçar ndodhet ende në institutin e mjekësisë ligjore dhe pritet që të martën të përcillet për në banesën e fundit.
“Të hënën marrim trupin e tij. Kemi dëshirë që ta varrosim Zenelin tonë në atdheun tonë në Kosovë, të martën”.
Disa ditë më parë, 4-vjeçari teksa po luante në një park me bashkëmoshatarët rrëshqiti dhe ra në lumin e qytetit. Trupi i tij i pajetë u gjet ditën e nesërme nga një punëtor i hidrocentralit të qytetit.
