Duket se kryeministrit Rama i është sosur durimi me proceduarat për çeljen e negociatave për anëtarësimin në Bashkimin Europian, që me shumë gjasa nuk do të fillojnë as këtë vit. Gjatë aktivitetit për ‘Javën e Europës’, kryeministri Edi Rama u shpreh se Shqipëria ka bërë hapa të rëndësishëm sipas kërkesave të Brukselit. Për kreun e ekzekutivit shqiptar, puna e bërë deri më tani nuk është bërë vetëm për të përmbushur kërkesat e Parisit, Brukselit apo Berlinit, por me qëllimin për ta bërë Shqipërinë një vend më të mirë.
“BE ka një rol të rëndësishëm në forcimin e rolit të shtetit. Rruga për të shkuar në BE është shumë më e rëndësishme se mbërritja. Kjo sepse sa më shumë hapa bëjmë për në BE, aq më shumë e forcojmë shtetin ligjor. Ne në Tiranë nuk punojmë vetëm për atë që na thotë Berlini a Brukseli dhe Parisi, por punojmë për një Shqipëri më të mirë nesër, për t’iu lënë fëmijëve tanë një vend sa më të begatë.”- tha Rama
Më tej për kryeministrin Rama, fakti që KE rekomandon hapjen e negociatave, do të thotë se vendi ynë i ka bërë detyrat e shtëpisë.
“Sa i përket negociatave, Komisioni Europian në Tiranë pas një pune të gjatë dhe të saktë për realitetin këtu, duke dokumentuar situatën me racionalitet, u shpreh pro rekomandimit për hapje të negociatave me Shqipërinë. Dhe kur KE rekomandon hapjen e negociatave me Shqipërinë, kjo do të thotë as më pak e as më shumë se ne kemi bërë detyrat e shtëpisë”, u shpreh kryeministri Rama.
