24 orë para protestës së madhe të paralajmëruar nga Opozita në Tiranë, ish-deputetja e Grida Duma ka folur në emisionin “Top Talk” në Top Channel. Sipas Dumës nuk do të shkojë më pas kryeministrit Rama. Ajo tha se kjo është një betejë e fortë për të ndryshuar sistemin politik dhe PD duhet të organizohet në nivelin e saj më të lartë.
“Ne nuk do të shkojmë pas Ramës. Pa diskutim që simbolika më e rëndësishme e shqiptarëve është Tirana, bulevardi. Kjo është një betejë për të fituar një sistem tjetër. Duhet theksuar që duhet një qartësi më e madhe në vijimin e këtij aksioni. Duhet qartësi e plotë me forumet e larta të partisë të cilat duhet të angazhohen në vendimmarrje më shumë për të maksimizuar forcën opozitare.
Sipas ish-deputetes demokrate në protestën e nesërme do duhet të ruhen shumë mirë ekuilibrat mes protestës së madhe dhe faktit që PD është përgjegjëse që ky vend të mos dëmtohet.
“Unë ju siguroj që ajo që po bëjmë është të mbajmë një ekuilibër mes protestës së madhe dhe faktit që jemi përgjegjës që ky vend të mos dëmtohet. Është një ekuilibër i vështirë, por besoj se dhe me kosto të brendshme ne e kemi mbajtur revoltën popullore që të mos e shfaqë forcën”, theksoi Duma.
