Greva ‘paralizon’ aeroportin e Rinasit, ja me sa orë do të shtyhen fluturimet

Fluturimet nga aeroporti i Rinasit me kompanitë Alitalia, Blue Panorama dhe Blue Air ditën e nesërme do të kenë probleme. Për shkak të një grevë që janë duke bërë punonjësit e këtyre kompaninë pritet të ketë vonesa she shtyrje të udhëtimeve për ata qytetarë që kanë prenotuar me këto tre kompani.

Lajmin e ka bërë të ditur përmes një njoftimi të shpërndarë për mediet, Autoriteti i Aviacionit Civil shqiptar, i cili ndër të tjera iu bën thirrje qytetarëve shqiptarë që të komunikojnë me agjencitë ku kanë prerë biletat.

“Autoriteti i Aviacionit Civil shqiptar, i bën apel të gjithë pasagjerëve që do të udhëtojnë ditën e nesërme, e Martë 21 Maj, nga Tirana drejt Italisë dhe anasjelltas, se për shkak të një greve që pritet të jetë 24-orëshe, do të ketë anulime dhe vonesa të fluturimeve.

Vonesat dhe anulimet e më shumë se gjysmës së fluturimeve vijnë si pasojë e një greve të pilotëve, teknikëve dhe asistentëve të fluturimit të kompanisë Alitalia, Blue Panorama dhe Blue Air.

Për të shmangur pritjet e gjata, këshillojmë të gjithë personat që kanë parashikuar të udhëtojnë nga dhe drejt Italisë ditën e martë, që të kontrollojnë dhe të komunikojnë me kompanitë ku kanë rezervuar biletat e udhëtimin, për t’u njohur me statusin e fluturimit”, njofton Autoriteti i Aviacionit Civil.