Bankat po japin më pak kredi për ekonominë, një sinjal negativ që flet për një gjendje jo të mirë të bizneseve dhe qytetarëve, që janë edhe agjentët kryesorë ekonomikë.
Të dhënat e Bankës së Shqipërisë tregojnë se kredia për ekonominë u tkurr sërish gjatë muajit prill, duke rënë në rreth 545 miliardë lekë. Të dhënat e detajuara flasin për një tkurrje të lehtë në krahasim me një muaj më pare, si për segmentin e biznesit, ashtu edhe për individët.
Bizneset duket se po hezitojnë për të zgjeruar veprimtarinë e tyre gjatë kësaj periudhe, çka shoqërohet me tkurrjen e huave për blerje pajisjesh. Ndërsa edhe individët janë më të pasigurt për të kryer investime afatgjata, çka reflektohet në rënien e kredive për shtëpi dhe zhvendosjen drejt konsumit.
Nga ana tjetër, depozitat figurojnë në rritje krahasuar me të njëjtën periudhë të një viti më parë. “Paraja që fle” dhe që nuk investohet në ekonomi, arriti në 998 miliardë lekë në fund të Prillit, teksa raporti i depozitave në euro kundrejt atyre në lek është rritur.
