Basha largon çadrën dhe prin marshimin: Ta dëgjojë gjithë bota, Rama ik

Kryetari i Partisë Demokratike, Lulzim Basha ka prirë marshimin e protestuesve të Opozitës drejt Drejtorisë së Policisë. Basha pasi mbaroi fjalimin e tij iu ka kërkuar të gjithë protestuesve që t’i përgjigjen se përse kanë janë mbledhur sot.

Gjatë një momenti duke marshuar, Basha ka hequr çadrën dhe ka përshëndetur të gjithë protestuesit.

“Jemi gati për marshimin historik të protestës. Na ndiqni, bëhuni gati për këtë marshim, të nisim marshimin tonë të shpresës, të lirisë, të demokracisë, kundër dhunës qeveritare, kundër dhunës së pushtetit të bërë njësh me krimin. Dy institucione që iu takojnë qytetarëve janë pjesë e bashkimit tonë. Qeveria e cila është e kapur nga krimi. Cili është mesazhi juaj ta dëgjojë Shqipëria, ta dëgjojë bota? Rama ik.

Të gjithë aleatët e PD-së, të gjithë partitë opozitare dhe artistët e Teatrit Kombëtar, pedagogët e universiteteve, elita, drita e syve tanë, rinia shqiptare, studentët shqiptarë të bashkuar, njerëzit e larguar me të padrejtë nga administrata dhe për fat të mirë shumë të tjerë sot akoma në administratë që kanë thyer frikën. Frika po vdes, shpresa po ngjallet.

Marshimi ynë, së pari drejt institucionit të kryeministrit, që nuk nxjerr më ligje, më pas drejt Drejtorisë e Përgjithshme e Policisë, me mesazhin se ne duam një polici të ligjit, jo një polici të krimit. Pas kësaj drejt Parlamentit, dhe më pas drejt Ministrisë së Brendshme, ku sundon një njeri që s’njeh kushtetutë dhe ligj, por vetëm një vegël e verbër. Dhe së fundmi aty ku mbahen vëllezërit dhe motrat tona, në Drejtorinë e Policisë së Tiranës. Le t’u japim dhe njëherë shqiptarëve kumtin e protestës sonë ‘E duam Shqipërinë si gjithë Europa’, ‘Rama ik””, deklaroi Basha.