Basha i bashkohet protestës para Drejtorisë së Policisë, paralajmëron Ramën: Nesër do të marrësh përgjigje, i ke orët e numëruara

Kreu i PD, Lulzim Basha u është bashkuar protestuesve tek Drejtoria e Policisë në Tiranë, për të kërkuar njëzëri lirimin e të arrestuarve në protestën e djeshme.

Në një prononcim për mediat, Basha u shpreh se dhunës së ushtruar dje ndaj qytetarëve dhe figurave politike, do të marrë nesër përgjigje proporcionale nga populli i vendosur për ta çuar deri në fund këtë betejë.

“Vetëm pak orë më parë, junta kriminale e Ramës e shndërroi Tiranën në një fushë betejë  me popullin, të cilët u bashkuan në protestën më të madhe për liri e demokraci, kushtetutë e shtet të së drejtës, për gjithçka s’duhet e do ta bëjë Shqipërinë Europë.

Pak orë më parë të gjitha rrugët u mbushën nga dozat luftarake të gazit lotsjellës e helmues, akt kriminal që kjo juntë i përgjigjet aspiratës së shqiptarëve.

E kanë të kotë, populli, shqiptarët, opozita nuk ndalet!

Javë pas jave, që nga dita që Rama mori pushtetin me bandat e krimit, është asgjësuar çdo institucion, parlamenti ishte i pari që ra.

E gjithë Shqipëria e bashkuar kundër një grushti kriminelësh, që kanë instaluar juntën e krimit në vend. Junta i ka orët e numëruara, Maduro o i Ballkanit i ka orët e numëruara.

Dhuna barbare ndaj protestuesve, vajzave, grave, figurave politike, Dollapit që u dhunua vetëm për të dërguar mesazh junte mafie, do të marrë nesër përgjigje proporcionale nga populli i vendosur për ta çuar deri në fund ktë betejë.

O me juntën kriminale o me popullin e bashkuar për liri!

I bëj thirrje të gjithëve, jo pseudointelektualëve të Ramës, ata le të rrinë të hanë nga uturakët e Ramës, por për artistët e vërtetë, të vazhdojnë të na bashkohen.

Kjo është beteja jonë, kurrë jo për pushtet, për karrige, ato i vendos vetëm populli, me votë të lirë dhe të ndershme”, tha Basha.