Vonesat në dogana, Banka Botërore jep miliona për lehtësimin e tregtisë

Banka Botërore financon uljen e kostove në tregti mes vendeve të rajonit. Bëhet fjalë për një projekt me vlerë 140 milionë dollarë, të miratuar nga Bordi i Drejtorëve të Bankës Botërore, që synon të eleminojë vonesat në pikat e kalimit kufitar, që në Ballkan Perëndimor janë pesë herë më të gjata se në shumë vende të Bashkimit Europian.

Në fazën e parë të projektit do të jepen 90 milionë dollarë, që do të ndahen mes Serbinë që do të përfitojë 40 milionë dollarë, Maqedoninë e Veriut që do ti akordohen 30 milionë dollarë dhe Shqipërinë që do të marrë 20 milionë dollarë.

Nga zbatimi i projektit parashikohet që kostot vjetore të import-eksportit të ulen me më shumë se 10 për qind.

Megjithëse vendet e Ballkanit mund të eksportojnë pa tarifa në Bashkimin Evropian, vetëm 10 deri në 20% e firmave të këtij rajoni janë eksportues.

Zbatimi i procedurave, përfshirë kontrollet dhe doganat, dhe koha e shpenzuar në pikat e kalimit kufitar e ulin efikasitetin, i rrisin kostot dhe e pengojnë tregtinë. Për shembull, në Shqipëri 87 për qind e kompanive shesin vetëm në tregun vendas, 10 për qind eksportojnë në BE dhe vetëm 3 për qind shesin në vendet e tjera të rajonit.

Ky projekt synon ta rrisë tregtinë rajonale nëpërmjet zvogëlimit të masave jotarifore, kohës së nevojshme për zhdoganim dhe kostove të përgjithshme të tregtisë.