Vlorë/ Zbulohen 400 fidanë kanabis gati për mbjellje, prangoset 57 vjeçari

Policia e Vlorës ka vënë në pranga një 57- vjeç i dyshuar për veprën penale “Kultivimi i bimëve narkotike”.

Ndërkohë që në gjendje të lirë po hetohet kryeplaku i fshatit Treblovë të Selenicës, pasi dyshohet se nuk ka përmbushur detyrat për kontrollin e territorit.

Njoftimi i policisë Vlorë:

– Vijojnë kontrollet e territorit për parandalimin e kultivimit të bimëve narkotike
– Goditet një tentativë për kultivim të bimëve narkotike

– Arrestohet në flagrancë autori i dyshuar, procedohet në gjendje të lirë kryeplaku i fshatit.

Ne vijim të kontrollit të territorit për parandalimin, evidentimin dhe goditjen e kultivimit të bimëve narkotike, shërbimet e policisë në fshatin Treblovë të Selenicës, kanë konstatuar pranë një përroi rreth 400 fidanë të dyshuara si kanabis, gati për t’u kultivuar.

Në përfundim të veprimeve të para hetimore, Policia ka arrestuar në flagrancë shtetasin K.V., 57 vjeç i dyshuar për veprën penale “Kultivimi i bimëve narkotike”.

U procedua në gjendje të lirë kryeplaku i fshatit, shtetasi B.M., 61 vjeç, për veprën penale “Shpërdorim detyre”, pasi dyshohet se nuk ka përmbushur detyrat për kontrollin e territorit.