Rudina Hajdari reagon për partinë e Astrit Patozit

Deputetja Rudina Hajdari ka folur për herë të parë për partinë “Bindja Demokratike” e themeluar nga Astrit Patozi, pas zërave për bashkimin e saj me këtë forcë të re politike.

“Zotit Patozi i uroj suksese, por do vazhdoj rrugën time”, ka deklaruar ajo, duke shtuar se nuk do të jetë pjesë e saj.

“Kam folur hapur me krijuesit, por nuk kam pasur asnjë lloj roli në krijimin e kësaj partie. Lajmet dolën se unë isha shprehur hapur, isha pro mos bojkotimit të zgjedhjeve. Isha pro dhe të formimit të një forumi politik që do përfaqësonin demokratët. PD dhe partitë e tjera kanë zgjedhur një mëyrë anti-kushtetuese dhe jo të përshtatshme të një vendi që kërkon të futet në BE”, deklaroi Rudina Hajdari në një emision në RTSH.

Deputetja tha se prioriteti kryesor do jetë grupi parlamentar demokrat. “Cdo gjë tjetër e shikoj pak të vështirë nuk dua që gjerat të ndodhin shpejt, duhet të jemi të matur. Nuk kam pasur asnjë rol në këtë parti politike”, theksoi më tej zonja Hajdari, e cila tregoi se ka pasur ftesë nga zoti Patozi.

E sa i përket fotos me Astrit Patozin, ajo tha se ishte e bërë disa kohë më parë dhe jo gjatë ditëve të fundit.