Rriten temperaturat, por rikthehen shirat

Deri pasdite, moti në Shqipëri do të jetë me kthjellime dhe vranësira kalimtare. Më pas, vranësirat do të shtohen, duke sjellë shira fillimisht në jug dhe gradualisht nga mbrëmja deri në mesnatë, shirat përfshijnë thuajse të gjithë vendin. Sipas A2 CNN, temperaturat janë rritur lehtë në mëngjes dhe rritja vijon edhe në mesditë, duke u luhatur në vlerat nga 6 deri në 26°C.

Edhe në vendet e tjera të Evropës moti vijon me kthjellime dhe vranësira të pakta në veri, qendër dhe zonat lindore, por vranësira të fuqishme dhe shira mesatarë deri intensivë, do të ketë jugu i kontinentit, kryesisht pellgu mesdhetar, me shirat që do të vijnë drejt brigjeve të Ballkanit.

Temperaturat sot rriten lehtë në gjithë Evropën, por më e ndjeshme kjo rritje do të jetë në Mesdhe, me Sardenjën dhe Sicilinë në krye, ku temperaturat do të shkojnë deri në 28°C.