Pronësia intelektuale, biznesi ndërgjegjësohet për rëndësinë e markës, mbi 2500 aplikime

Biznesi shqiptar po bëhet gjithmonë e më i ndërgjegjshëm për rëndësinë e markës. Të dhënat e Drejtorisë së Përgjithshme të Pronësisë Industriale tregojnë se gjatë vitit 2018, numri i aplikimeve për regjistrimin e markave kapërcyen 2500, duke shënuar kështu një rekord. Shifra u bë e ditur gjatë Konferencës Kombëtare “Pronësia Intelektuale dhe Sportet- Të arrijmë më të mirën”, organizuar në Ditën Botërore të Pronësisë Intelektuale.

Ministrja e Financave, Anila Denaj deklaroi se pronësia intelektuale është një aset i biznesit. “Në 5 vitet e fundit ka pasur një 4-fishim të regjistrimit të markave që mund të konkurrojnë. Pronësia intelektuale mund të shihet si një komunikim mes prodhuesve dhe konsumatorëve”, deklaroi Denaj.

Rëndësinë për regjistrimin e markave e theksoi edhe drejtori i përgjithshëm i Pronësisë Industriale, Elvin Lako. Ai e konsideroi një vit të suksesshëm 2018-ën, në kushtet kur ka pasur rekord në drejtim të aplikimeve për regjistrimin e markave.

“Ka një sensibilizim të komunitetit të biznesit për të kuptuar se nëpërmjet regjistrimit mund ta kthejnë markën në një mënyrë fitimi. Gjatë vitit 2018 ka pasur një rekod aplikimesh dhe kjo falë përmirësimit të shërbimeve nga ana jonë”, është shprehur Lako.

Gjatë javës së fundit, Drejtoria e Përgjithshme e Pronësisë Industriale ka organizuar aktivitete të ndryshme, me qëllim rritjen e ndërgjegjësimit dhe informimin e shoqërisë në tërësi me çështjet e të drejtave të pronësisë industriale duke shpërndarë fletëpalosje, broshura dhe materiale promocionale të përgatitura nga Zyra Europiane e Patentave. Aktivitetet janë zhvilluar në shkollat e arsimit të lartë duke përfshirë dhe Universitetin e Sporteve, si dhe nëpër sipërmarrje të rëndësishme që kanë regjistruar objektet e pronësisë industriale.