LIGJET E BIZNESIT
A bëhet krim i organizuar ushqimor shtetëror në Shqipëri, dhe përse lihet i lirë e në veprim, ky krim njerëzor, që “të vret me bukë në gojë e ta merr shpirtin çika-çika përditë”?
Përgjigjen do ta japin analizat e 24 produkteve, që “PAMFLETI” po bën në laboratorë të çertifikuar nga BE, dhe investigimi i gazetarëve tanë, në terren e regjistra tatimorë, ku rezulton se në sektorin ushqimor 18 produktet bazë jetikë të konsumit masiv, të prodhimit, importiit, distributorët e shumicës, tregjet e përqëndruar nëpër bashki dhe rrjetet e super-marketeve, janë biznes i shtetarëve, oligarkëve, politikanëve e familjarëve të tyre.
Tre ditë më parë, u publikua krimi ushqimor që bëjnë fermerët e serave, të cilët skuqin domatet e shalqinjtë brenda 2-3 orësh, kur në kaq pak kohë, nuk mbaron as bojatisja e një apartamenti 1+1, ndërkohë që u denoncua edhe djathi me allçi e akulloret me qumësht të dalë nga skadenca dhe përbërës kimik ngyrosës e mpikës.
Kemi përditë dhjetra denoncime, për marifetet “vrasëse”, që bëhen me ëmbëlsirat, bulmetrat, djathë, gjalpë, miell, vaj, bukë, biskota, mish e deri tek “magjia” e sallamit me etiketë “Sallam e kremviçe me mish të freskët viçi”, por që kushton vetëm 300-500 lekë/1 kg., kur mishi i viçit është 850 lekë/1 kg, shkruan “PAMFLETI”.
Madje, “ustallarët” e falsiteteve ushqimore, janë futur edhe brenda vezëve, ndërsa për kosin, etiketat e fabrikave që punojnë me 70% qumësht pluhur, thonë se kosi është 100% me qumësht lope nga kullota natyrale, por kur e përdor, zbulon se ky lloj kosi si vinovil, nuk “zë as për farë kosi”, ndërkohë që viçat fryhen me ”Boldomec” (vitaminë për trupa Bodybuilding), aq sa brenda javës, viçi shton 3 herë peshë dhe nuk e njeh as lopa që e ka pjellë.
Ditët e fundit, me pyetjen alarmante: – “Çfarë ushqimesh hamë dhe sa na vrasin shëndetin e jetën?, ka nisur përsëri debati në media e mjedise publike, por “çuditërisht”, nuk po thuhet asnjë fjalë nga AKU-ja, Presidenca, Kryeministria, Parlamenti, Doganat dhe 15 inspektaratet që e kanë detyrim ligjor, të merren me sigurinë ushqimore.
Shteti, që kontrollon edhe xhepat e çantat e dorës në kufi, në autobusa, furgona e rrugës kur nisesh për në protestë e po kështu, “hijenat” e policive bashkiake, që kontrollojnë edhe çitjanet plakave se mos kanë fshehur tranguj, domate e speca, nuk kontrollojnë maunet, kamionët e furgonët me ushqime, që futen në pikat kufitare, që dalin nga pikat e shumicës dhe fabrikat mishit, sallameve, bukës, miellit, vajit, ëmbëlsirave e shpërndajnë ushqime lirshëm, në tregje e zona.
Spas invetigimit që kanë bërë në terren, 12 gazetarë të “PAMFLETI” në të 12 prefekturat dhe në regjistrat e tatimeve e doganave, konstatohet një masakër ushqimore masive, në prodhim, import, tregje e brenda super-marketeve me falsifikme etiketash e data skadenash.
Por lihen në heshtje, sepse 80% të bizneseve ushqimore prodhim, import, distrubutorë (monopol) tregje bashkie, “fast-Food”, restorante, pika shumice e rrjete super-marketesh, i kanë zyrtarët e kryeministrisë, të AKU, të Ministrisë së Bujqësisë, të inspektorateve shëndetësore e mjedisore, të bashkive e tatimeve dhe 15 deputetë.
Ja 15 institucione e shërbime shtetërore me 16 mijë zyrtarë e punonjës, që kanë detyrë të kontrollojnë e garantojnë sigurinë ushqimore
- Këshilltarë Social-Ekonomik në Presidencë.
- Taskë forca e kontrollit ushqimor në Kryeministri.
- Drejtoria e Ushqimit dhe Tregjeve në Ministrinë e Bujqësisë
- Inspektorati Qendror.
- Zyra e Mbrojtjes së Konsumatorit.
- Zyrat e Ushqim-Tregjeve në çdo bashki.
- Drejtoritë e Kontrollit Ushqimor në Pikat Kufitare (PIK).
- Zyra e Mbrojtjes nga Rrezatimet.
- Autoriteti Kombëtar i Ushqimit (AKU).
- Drejtoria e Standardeve Ushqimore në Ministrinë Ekonomi-Financa.
- Shërbimi i Kontrollit të Peshkimit dhe Akuakulturës.
- Drejtoria e Shërbimit Veterinar.
- Inspektorati Shtetëror i Mbikëqyrjes së Tregut.
- Inspektorati Shtetëror Shëndetësor.
- Inspektorati Shtetëror Teknik e Industria.
Burimi: “PAMFLETI”,
