Salianji i pandehur, reagon PD: Nuk na e mbyllni dot gojën

Ish-deputeti i Partisë Demokratike, Ervin Salianji, merret i pandehur nga Prokuroria e Tiranës për çështjen “Babale”. Fill pas veprimit të Prokurorisë së Tiranës ka reaguar edhe Partia Demokratike. Në një reagim zyrtar, selia blu thotë se prokuroria e kapur nga Rama mbron trafikantët dhe merr nën hetim denoncuesit.

“Prokuroria nuk zhgënjeu dhe sot, kur zyrtarizoi vendimin politik të Edi Ramës për marrjen të pandehur të Ervin Salianjit. Asnjë surprizë nuk ka në këtë vendim, ku i akuzuar është denoncuesi dhe jo ai që bën krimin

Vendimi politik i Prokurorisë është paralajmëruar nga Edi Rama që ditën e parë të zbulimit të skandalit nga Partia Demokratike. Akti i sotëm dëshmoi, edhe njëherë se, për sa kohë Edi Rama të jetë në Qeveri, drejtësia i ka duart e lidhura dhe krimi i organizuar do të jetë i paprekshëm. Edi Rama dhe prokuroria e tij politike nuk do t’ia mbyllin dot gojën opozitës!”- thuhet në deklaratën për mediat.