Kuvendi mblidhet më 5 mars, mazhoranca, sërish “lojra” me orën

Seanca e ardhshme parlamentare do të mblidhet në datën 5 mars, pra të martën. Po ashtu si herën e kaluar Kuvendi ka njoftuar datën dhe ka mbajtur të fshehtë orën se kur do të mblidhen deputetët në Parlament.

Në faqen zyrtare të kuvendit është publikuar rendi i ditës dhe projektligjet për t’u miratuar, por ora e nisjes së seancës mungon. Seanca e fundit e Kuvendit, në datën 26 shkurt, u njoftua brenda ditës dhe u zhvillua pasdite. Megjithatë, kjo nuk e pengoi opozitën të thërriste mbështetësit e saj për të rrethuar institucionin ku mbanin fjalimet deputetet socialistë.

Ndërkaq, Policia e Tiranës, i ka ndaluar opozitës që të zhvillojë protesta para Parlamentit. Opozita sipas policisë duhet të gjejë një tjetër vend për të vijuar tubimin.