Bilanci i protestës/ 23 të proceduar nga Policia, mes tyre edhe Gazmend Bardhi

6 protestues janë arrestuar nga Policia e Tiranës nën drejtimin e Prokurorisë së Rrethit Gjyqësor Tiranë për veprime të dhunshme mbi institucionet gjatë protestës së sotme para Parlamentit. Arrestimet janë bërë mbi bazën e analizës të pamjeve filmike, raport shërbimeve, si dhe provave të tjera të mbledhura nga grupi hetimor.

Policia bën të ditur se në gjendje të lirë janë proceduar edhe 17 persona të tjerë, ndërsa 6 shtetas janë shpallur në kërkim. Mes të proceduarve penalisht është edhe Gazmend Bardhi, Sekretar i Përgjithshëm i Partisë Demokratike, i cili ishte edhe organizator i protestës.

6 shtetasit e arrestuar akuzohen për konsumimin e elementëve të veprave penale “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike”. Policia bën të ditur se të arrestuarit janë:

– J.Gj., 24 vjeç, nga Shijaku;
– M.D., 24 vjeç, nga Mamurrasi;
– A.K., 20 vjeç, nga Rrësheni;
– B.D., 36 vjeç, nga Kavaja;
– E.M., 26 vjeç, nga Kavaja;
– D.P., 31 vjeç, nga Tirana.

“Po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme. Materialet proceduriale do t’i referohen Prokurorisë së Rrethit Gjyqësor Tiranë, për veprime të mëtejshme”, thekson Policia e Tiranës.