Vlorë/ Nipi vrau gjyshin me të njëjtin emër, në pranga edhe tre të rinj

Një adoleshent nga Vlora vrau gjyshin e tij 69-vjeçar, për t’i marrë 1 milionë lekë të vjetra që ndodheshin në banesë. 16-vjeçari qëlloi me një plumb në kokë gjyshin e tij Vangjel Kapllani dhe më pas ngjarjen e raportoi si grabitje.

Pas vrasjes së Vangjel Kapllanit, janë arrestuar nga policia edhe tre të rinj të tjerë për mbajtje pa leje dhe përdorim të armëve, të cilët dyshohet se i kanë shitur adoleshentit armën me të cilën qëlloi gjyshin e tij.

Policia ka arrestuar në flagrancë 3 persona, të cilët dyshohen se i kanë shitur armën e krimit autorit të ngjarjes, shtetasit L.M., 17 vjeç, F.Xh., 16 vjeç dhe M.A., 28 vjeç, të cilët u arrestuan nga Policia për veprën penale ‘Mbajtja pa leje dhe prodhimi i armëve, armëve shpërthyese dhe municioneve”, deklaron policia e Vlorës.

16-vjecari fillimisht tentoi të mashtronte efektivët e policisë. “Isha jashtë me shokët. Kur u ktheva, e gjeta gjyshin mes një pellgu gjaku. Na kishin marrë 1 milionë lekë që kishim në shtëpi”, deklaroi fillimisht adoleshenti.