Dhuna në protestë/ Policia tregon shifrat: 15 të arrestuar, 5 në hetim

Policia e Shtetit ka dhënë shifrat e të arrestuarave për akte dhune në protestën e opozitës, zhvilluar më 16 shkurt përpara kryeministrisë.

Sipas qëndrimit zyrtar të këtij institucioni, pas analizimit të pamjeve filmike, raport shërbimeve dhe provave të tjera të mbledhura, gjatë protestës së djeshme, ku pati akte të dukshme dhune, Policia ka arrestuar 15 shtetas për veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Shkatërrimi i pronës” dhe “Prishja e qetësisë publike”.

Gjithashtu u proceduan penalisht në gjendje të lirë 5 shtetas, si dhe janë shpallur në kërkim dhe po punohet për kapjen e 7 të tjerëve.

Mes të arrestuarve është edhe ish-kreu i Policisë Bashkiake Florenc Hoxha. Gjithsej janë 7 të arrestuar nga Tirana, 1 nga Kavaja, 2 nga Shkodra, 1 nga Divjaka, 1 nga Durrësi, 1 nga Elbasani, 1 nga Cërriku dhe 1 nga Fieri.

Policia bën të ditur se materialet iu dërguan për veprime të mëtejshme Prokurorisë së Rrethit Gjyqësor Tiranë.