Deputetët e PD-së hyjnë me forcë në Drejtorinë e Policisë së Tiranës

Policia ka arrestuar disa prej 20 protestuesve të shoqëruar sot pasdite për dhunimin e ambienteve publike gjatë protestës së opozitës. Arrestimi i tyre u bë, pasi nga kamerat e sigurisë janë identifikuar si personat që kanë kryer akte dhune gjatë protestës së sotme.

Në Drejtorinë e Policisë së Tiranës kanë mbërritur edhe deputetët e opozitës Enkelejd Alibeaj, Flamur Noka dhe Gent Strazimiri. Mes deputetit Noka dhe policëve ka pasur tension dhe përplasje. Deputetët demokratë kanë kërkuar të takojnë protestuesit brenda ambienteve të Drejtorisë së Policisë, por oficerët e policisë i kanë ndaluar.

Jashtë ambienteve të Drejtorisë së Policisë së Tiranës, deputeti Noka deklaroi se janë arrestuar 7 nga të shoqëruarit. “E gjithë kupola e policisë la deputetët 1 orë këtu pa përgjigje. Menduam se kishin punë, por kur u ngjitëm sipër çfarë gjetëm? Kupola e drejtorisë, drejtorë e vartës i gjetëm si një tufë derrash të zhgërryer në uiski, vodka dhe red bull. Kemi pamje filmike se si janë dhunuar të ndaluarit”, deklaroi Noka.

Ndërkaq jashtë ambienteve të policisë ndodhen edhe familjarë të të shoqëruarve.