Sipas të dhënave më të fundit të publikuara nga zyra eUropiane e statistikave, Eurostat, rreth 24.6% e qytetarëve në Shqipëri takohen me rrethin e tyre shoqëror apo familjar çdo ditë, një tregues ky që e pozicionon vendin tonë dukshëm mbi mesataren e shumë ekonomive të zhvilluara të Europës Perëndimore dhe Veriore.
Megjithatë, kur bëhet fjalë për përqindjen e popullsisë që realizon kontakte të përditshme, disa vende në Europë renditen më mirë se Shqipëria, në krye të të cilave spikat Qiproja me 48.1%, e ndjekur nga Sllovakia me 29.1% dhe Kroacia me 26.9%.
Ky intensitet i lartë i bashkëveprimit social, në një kohë që vendet perëndimore karakterizohen gjithnjë e më shumë nga rritja e individualizmit dhe struktura të izoluara banimi, ku në Francë treguesi i takimeve të përditshme regjistrohet në vetëm 10%, në Austri në 6.8%, në Holandë në 5.1% dhe në Suedi në 3.6%, dëshmon për një formë të veçantë të “kapitalit social” që ruan rolin e një amortizuesi të rëndësishëm në mbështetjen e mirëqenies së përditshme.
Përveç këtyre takimeve të përditshme që përbëjnë një peshë të konsiderueshme, statistikat e Eurostat tregojnë se 20.5% e popullsisë shqiptare zhvillon takime javore, ndërsa 15.7% e qytetarëve takohen me miqtë apo të afërmit e tyre një herë në muaj dhe rreth 19.3% raportojnë kontakte periodike disa herë në muaj.
shoqëria shqiptare vazhdon të ruajë me forcë një model të bazuar te lidhjet e ngushta, ku kontaktet e shpeshta fizike dhe mbështetja e ndërsjellë mbeten baza e përditshmërisë.
Në një analizë më të gjerë socio-ekonomike, ky “kapital social” i trashëguar shërben shpeshherë si një rrjetë e rëndësishme sigurie përballë sfidave të vazhdueshme të standardit të jetesës dhe të ardhurave të kufizuara. Ekspertët e çështjeve sociale vënë në dukje se ndihma e ndërsjellë brenda rrethit familjar zbut deri diku goditjet financiare, megjithatë sfidat mbeten të mëdha për shkak të lëvizjeve demografike dhe emigracionit që rrezikojnë të tkurrin këto bërthama tradicionale./Monitor

The post Shqipëria mban ende të forta lidhjet familjare, 24,6 % e popullsisë takohet përditë me familjen appeared first on Fast News Economy.

“Dëshiroj të theksoj edhe dy konstatime që janë bërë nga Këshilli Mbikëqyrës, faktin që forcimi i vazhdueshëm i kursit të këmbimit vazhdon të ndihmojë në reduktimin e përcjelljes të inflacionit të huaj në tregjet shqiptare dhe po ashtu faktin që kahu konsolidues i politikës fiskale, ushtron një ndikim frenues në inflacion, pra në tërësi, i gjithë konteksti makroekonomik, politika monetare, zhvillimet në kursin e këmbimit dhe politika fiskale u gjykuan se ishin të përshtatshme për ruajtjen e inflacionit në të ardhmen”, tha Themeli.

Rritja e çmimit të naftës në tregjet ndërkombëtare ndikoi në rritjen e inflacionit nga 2.5% që ishte në tremujorin e parë, në 3% në tremujorin e dytë, por ajo vazhdon të mbetet brenda objektivit të Bankës së Shqipërisë. Sipas tij, çmimet do të rriten edhe më shumë në vijim.

“Banka e Shqipërisë pret që në horizontin afatmesëm, inflacioni të qëndrojë pranë objektivit të Bankës së Shqipërisë prej 3%. Presim një nivel inflacioni disi më të lartë se objektivi jonë në terma afatshkurtër, në dy tremujorët e mbetur të vitit 2026 dhe dy tremujorët e parë të vitit 2027, por gjithsesi jo një shmangie të ndjeshme mbi objektiv dhe më tej, duke filluar nga viti 2027 presim një rënie graduale dhe progresive të inflacionit në objektiv”, theksoi Drejtori i Politikës Monetare.

Ndërkohë, norma bazë e interesit, e cila konsiderohet të jetë më e ulëta në rajon dhe në krahasim me normën bazë të interesit të Bankës Qendrore Evropiane, ka sjellë rritje të shpejtë të kreditimit.

The post Rritja e çmimeve, BSH: Forcimi i lekut mbrojti konsumatorët nga ndikimi edhe më i madh appeared first on Fast News Economy.

Televizori ka një sërë anësh negative tek fëmijë, ndaj prindërit që lenë fëmijët në pjesën më të madhe të kohës të përqendruar përpara ekranit, duhet të ndryshojnë këtë rregull.

Studiuesit kanë thënë se fëmijët që qëndrojnë me orare të zgjatura përpara televizorit, mund të kenë disa probleme. Sipas tyre, kjo shkakton efekte negative në zhvillimin e tij psikologjik, mendor dhe fizik.

Ashtu siç është i rëndësishëm zhvillimi i fëmijës deri në moshën 2 vjeç, po aq i rëndësishëm është dhe zhvillimi i trurit të tij. Fëmijët kanë nevojë për një komunikim aktiv me fëmijët e tjerë, për lojëra interaktive për një zhvillim të shëndetshëm të trurit.

Gjatë muajve të parë të jetës truri i fëmijës zhvillohet shumë shpejt. Në fund të vitit të parë truri është zhvilluar tri herë më shumë në krahasim me gjendjen kur ka lindur. Nxitësit, ndaj të cilëve ekspozohet fëmija gjatë kësaj periudhe ndikojnë pozitivisht ose negativisht në varësi të efektit të tyre.

Shumë prindër mendojnë se shikimi i televizorit nga fëmija që në moshë të vogël ndikon pozitivisht në zhvillimin e tij mendor. Por, në të kundërt të këtij mendimi specialistët pohojnë se shikimi i televizorit shkakton disa çrregullime, ndër to edhe mbipeshë.

Sipas Dr. Dimitri Christakis, kërkues shkencor në Spitalin e Fëmijëve dhe në Qendrën Rajonale Mjekësore në Seattle, koha e tepërt përpara televizorit kontribuon në obezitetin dhe agresivitetin tek fëmijët.

Sipas Dr. Dimitri që për më shumë se një dekadë ka mbështetur eleminimin e televizionit gjatë viteve të para të fëmijës: “fëmijët shikojnë mesatarisht televizor 43 orë në javë, që është më shumë se orët e punës së një të rrituri në javë. Gjatë shikimit, ata shumë shpejt bëhen pothuajse të hipnotizuar.

Është treguar shkencërisht që pas pak minutash para televizorit, truri ndryshon nga valë vigjilente të trurit (valët beta) në valë hipnotike (valët alfa), ku qendra e gjykimit të trurit anashkalohet. Kështu dhuna dhe dekadenca që sheh fëmija, anashkalon qendrën e gjykimit dhe ngulitet në trurin e fëmijës pa ndonjë aftësi nga ana e fëmijës për të vendosur nëse ajo që sheh ai është e mirë apo e gabuar.

Dhuna dhe dekadenca pranohen nga truri pa iu nënshtruar ndonjë gjykimi moral. Atëherë ajo bëhet pjesë e subkoshiencës së përhershme të fëmijës. Mënyra jonë e jetës, por edhe ambienti jonë ka ndryshuar shumë në dhjetëvjetëshin e fundit.

Kështu është shtuar trafiku rrugor dhe dendësia e ndërtimit, gjë që ka bërë,që fëmijët të mos munden të luajnë në rrugë apo në vende të tjera, përveç vendeve posaçërisht të parapara për lojë.

Hapësira e aksioneve të fëmijëve dhe mundësitë e tyre që ta njohin ambientin në mënyrë aktive dhe ta “robërojnë“ atë, janë fort të kufizuara, dhe kështu nevoja për lëvizje natyrore është e penguar. Është bërë një mbartje e lojërave nga jashtë brenda, që përmes konsumit medial po bëhet më e fortë.

The post Shpëtoni fëmijët nga televizori! appeared first on Fast News Economy.

Të dhënat e Observatorit të Pushimeve të Francezëve, EDV–Orchestra, tregojnë se gjatë korrikut, udhëtimet e francezëve drejt Shqipërisë u rritën me 288,2% krahasuar me të njëjtën periudhë të një viti më parë. Me këtë rezultat, Shqipëria u rendit e dhjeta mes destinacioneve të zgjedhura nga francezët, në një kohë kur vende tradicionale turistike si Greqia, Italia, Portugalia apo Turqia shënuan rënie.

Rritja e interesit për Shqipërinë është sjellë në vëmendje edhe nga BFM Business, e cila i ka kushtuar një material bumit të udhëtimeve të francezëve drejt vendit tonë.

Sipas medias franceze, një prej faktorëve që po e bën Shqipërinë më tërheqëse është kostoja relativisht më e ulët e pushimeve krahasuar me destinacione të konsoliduara të Mesdheut, si Greqia, Italia apo Kroacia. Në material përmenden çmimet më të përballueshme të ushqimit dhe akomodimit, ndërsa një tjetër avantazh lidhet me shtimin e lidhjeve ajrore dhe veçanërisht të fluturimeve me kosto të ulët drejt Tiranës.

Por çmimi nuk është i vetmi element. BFM Business veçon edhe Rivierën Shqiptare, Ksamilin, plazhet me ujëra të kristalta, zonat malore dhe trashëgiminë kulturore, të cilat, të promovuara gjerësisht edhe në rrjetet sociale, kanë rritur ekspozimin e Shqipërisë në tregun ndërkombëtar.

Materialin e BFM Business për rritjen e interesit të turistëve francezë e ka shpërndarë në rrjetet sociale edhe kryeministri Edi Rama, duke e sjellë atë si një tjetër tregues të ecurisë së sektorit turistik.

The post Francezët zgjedhin Shqipërinë – U rritën me 288,2%. “BFM Business” veçon çmimet, aksesin dhe rivierën appeared first on Fast News Economy.

Në total, për 6 mujorin e parë 2026 janë arkëtuar nga ‘taksa e ndikimit në infrastrukturë nga ndërtimet e reja’ në të gjithë vendin 18.3 miliardë lekë, ose tre herë më shumë se e njëjta periudhë e një viti më parë (+200%).

Edhe në krahasim me vitin 2024, që deri tani mbante rekordin e dekadës së fundit për të ardhurat nga kjo taksë lejet e sipërfaqes më të lartë të lejeve të dhëna, të ardhurat mëse janë dyfishuar (+120%).

Të ardhurat e mbledhura për 6 mujorin janë të barabarta me shumën që u arkëtua në gjithë vitin 2024 (18.6 miliardë lekë) dhe 15% më shumë se arkëtimet e gjithë vitit 2025.

Për krahasim, në gjithë vitin 2024, u dhanë sipas të dhënave zyrtare të INSTAT lejë për rreth 2 milionë metra katro sipërfaqe ndërtimi.

Tirana mban rekord, 68% e të ardhurave

Kryeqyteti shqiptar ka qenë kryeqendra e valës së ndërtimeve të dekadës së fundit. Ndërsa duket se nuk ka mbetur më vend pa u ndërtuar, ritmet pritet të përshpejtohen në vitet në vijim.

Të dhënat zyrtare tregojnë se rreth 68% e të ardhurave në 6 mujorin e parë 2026 kanë ardhur nga Bashkia Tiranë, ose 12.5 miliardë lekë, që është gati sa shuma e arkëtuar për gjithë vitin 2025 dhe 362% më shumë se e njëjta periudhë e 2025-s, ose gati 5 herë më shumë (në 6 muajt e parë të 2025-s u arkëtuan 2.7 miliardë lekë).

Duke llogaritur që taksa e infrastrukturës në Tiranë është sa 8% e çmimit të shitjes për metër katror, mbi çmimet referuese të tregut, sipërfaqja e dhënë për ndërtim i korrespondon një vlere ndërtimesh prej 156 miliardë lekë, ose 1.6 miliardë euro.

Ndryshimi i fundit i çmimeve referuese për apartamentet në Bashkinë Tiranë është bërë në korrik 2023, me VKM nr. 457, datë 26.07.2023. Çmimet e reja hynë në fuqi në fund të korrikut 2023 dhe zbatohen për 32 zonat kadastrale të Tiranës, çka nënkupton që rritja e të ardhura është tërësisht si rrjedhojë e shtimit të sipërfaqes së dhënë për leje ndërtimi.

Për krahasim, në vitin 2025, sipas të dhënave nga formimi bruto i kapitalit fiks, investimet në banesa në të gjithë vendin ishin 222 miliardë lekë dhe në ndërtesa dhe struktura të tjera 260 miliardë lekë. Vetëm në 6 mujorin e parë, lejet në Tiranë ishin sa 70% e gjithë investimeve për banesa në vend në 2025-n.

Himara dhe Saranda do të përballen me valë të re ndërtimesh

Jo vetëm Tirana, edhe bregdeti do të ketë një valë tjetër ndërtimesh, sidomos jugu. Rekordin e mban Himara. Të ardhurat e arkëtuara nga kjo bashki ishin 1.2 miliardë lekë, ose 301% më shumë se 6 mujori i parë 2025.

E treta nga vlera është Durrësi, me 841 milionë elëk, me rritje 58%.

Saranda ka arkëtuar 478 milionë lekë, ose gati 7 herë më shumë se e njëjta periudhë e 2025-s.

Ndërsa duket sikur në Golem nuk ka më vend për të ndërtuar, të ardhurat nga taksa e infrastrukturës u rritën me 37%.

Heshtje statistikore për lejet e ndërtimit

Që prej fillimit të vitit 2025, botimi i statistikave mbi lejet e ndërtimit mbështetet aktualisht vetëm në të dhënat e siguruara nga bashkitë, të cilat janë autoritetet kryesore për dhënien dhe raportimin e këtyre lejeve. Megjithatë, VKM nr. 408, datë 13.5.2015 “Për miratimin e rregullores së zhvillimit të territorit”, i ndryshuar*, përcakton se në procesin e miratimit të lejeve të ndërtimit përfshihen edhe institucione të tjera përgjegjëse, përveç bashkive.

Duke qenë se ende nuk ka një raportim të standardizuar dhe të plotë nga të gjitha këto ente pranë INSTAT, të dhënat e publikuara bazohen vetëm në burimet bashkiake.

Në mungesë të përditësimit të të dhënave nga INSTAT për sipërfaqen e lejeve të ndërtimit, që raporton prej gati një viti vetëm pushtetin vendor dhe jo lejet e Këshillit Kombëtare të Territorit dhe Ujit (KKTU), të ardhurat nga taksa e ndikimit në infrastrukturë janë treguesi më i saktë për përmasat që pritet të marrë ndërtimi në vend.

Muajt e fundit Këshillit Kombëtar i Territorit dhe Ujit kanë marrë në shqyrtim disa qindra kërkesa për leje ndërtimi e zhvillimi ku përfshihen projekte turizmi, rezidencialë, infrastrukturë publike, ndërhyrje në energji dhe transport. Këto leje nuk raportohen në statistikat zyrtare, duke krijuar mungesë transparence për atë se çfarë pritet të ndodhë realisht me një nga sektorët më dinamikë të ekonomisë, që vitet e fundit ka shërbyer si kanalizues i parasë informale, siç rezultoi qartë nga hetimet e SPAK.

Mungesa e transparencës nuk lejon analizën e sektorit, që vitet e fundit është përballur me një paradoks ku çmimet rriteshin ndjeshëm bashkë me ofertën dhe kërkesa zyrtare nuk e justifikonte këtë tendencë. Për më tepër, dhe ekspozimi i sektorin bankar është rritur ndjeshëm, me stokun e kredisë për pasuri të paluajtshme që përbën rreth 52% të totalit./Monitor

The post Ku do shkojë Tirana?! Në janar-qershor jepen 5-fish leje për ndërtime rekord, me vlerë 1.6 mld euro appeared first on Fast News Economy.

Para disa javësh, vajza ime dhe i ati udhëtuan në Zyrih. Kur mbërritën në hotel, zbuluan se rezervimi ishte bërë gabimisht në emrin tim, megjithëse unë nuk isha bashkë me ta.

Recepsionistja buzëqeshi, u kërkoi të prisnin pak, u ofroi një kafe dhe thirri menaxheren. Menaxherja e kuptoi menjëherë se bëhej fjalë për një gabim njerëzor. Jo vetëm i akomodoi, por u dha një dhomë më të mirë dhe u ofroi mëngjesin për të tri ditët.

Në Vlorë, në hyrjen e një resorti me pesë yje, vajza e pritjes dukej sikur kishte ardhur të mbronte një garnizon, jo të mirëpriste njerëz. Kur kërkuam të flisnim me një menaxher, ajo hezitonte ta thërriste.

Si përjetuese e të dy situatave të ndodhura në pak ditë, e pyeta vajzën time nga ndryshojnë këto dy modele pritjeje ?!

Me një zë të butë më përgjigjet:  “Vajza në Zhyrih para anomalisë ku prenotuesi nuk ishte pjesë e grupit nuk na dëboi, vuri mendjen në punë . Thirri menaxheren e cila kishte jo vetëm autoritetin të merrte vendim, por edhe eksperiencën e nevojshme për të gjykuar nëse ishte përpara dy njerëzve që po gënjenin apo ishte një ngatërresë.

Sapo u sigurua që ishte një ngatërresë, menaxherja pritjen prej 20 minuta e kthehu në një mundësi biznesi  me shumë pak kosto shtesë  për  hotelin . Dy klientë si të përdornim suitën që ajo ofroi si dhomën standarte që kishim paguar do të harxhonin po të njëjtën sasi uji , peshqirash , elektriciteti , ndërkohë fakti që na ofroi mëngjesin na shtyhu  të konsumonin edhe vakte të tjera në restorantin e hotelit .

Nëse nesër do të udhëtoja sërisht për në Zyrih do të shkoja pa më të voglin hezitim tek i njëjti hotel.

Vajza e pritjes në Vlorë, kishte një rregullore në vend të mendjes. Në mungesë të mendjes edhe në prani vetëm të rregullores  çdo njëri që paraqitet para saj duhet të paguante 3000 lekë të reja para se të ulej tek kafeja. Asnjë sqarim apo situatë e veçantë nuk ja ndryshonte qëndrimin . Ajo ngjante më shumë me një oficereje garnizoni ushtarak sesa me një ofruese shërbimesh të një resorti me pesë yje. Ajo jo vetëm nuk e kupton që çdo anomali është një mundësi për më shumë biznes, por ajo i hoqi mundësinë edhe menaxheres së saj që këtë anomali ta kthente në më shumë biznes për kafen thuajse bosh të resortit. Nuk do të kthehemi më as atje e as në Vlorë” .

Kjo ishte diferenca në mendjen jo prej ekonomisteje  të sime bije .

Ndërsa në gjuhen ekonomike ndryshimi midis dy priteve tregon dy modele të ndryshme të të bërit biznes . Në Zyrih mendohet për vlërën afatgjatë të biznesit në Vlorë vetëm për maksimizimin e fitimit.

Në modelin e biznesit që mendohet për vlerën çdo anomali në mikpritje mund të jetë problem, por mund të jetë edhe mundësi. Mundësi për të fituar besimin e klientit, për ta bërë të ndihet i veçantë dhe për ta kthyer atë në klient besnik. Menaxherja e hotelit  diti të lundronte me elegancë dhe me hir mbi anomalinë. Ajo nuk zbatoi rregulloren me ngurtësinë e një roboti  përkundrazi , e  përdori mjeshtërisht atë  për të bërë më shumë biznes.

Duke njohur  parimet e krijimit të vlerës në sektorin e mikëpritjes ajo transformoi një pritje 20 minuta në vlerë për biznesin që drejtonte, duke siguruar me fare pak kosto  besnikërinë  afatgjatë të klientëve  edhe mundësinë  për më shumë biznes në të ardhmen .

Në resortin e Vlorës mendohej vetëm  për fitimin e sotëm , ndaj rregulli që e maksimizonte atë ishte kthyer në qëllimin e stafit , edhe kujdesi ndaj njerëzve ishte vetëm një shtesë opsionale.

Në biznesin që mendohet vetëm për maksimizimin e fitimit edhe e drejta për të pirë një kafe me njeriun e afërt që po pushon atje mund të blihet vetëm me para .

Teksa e lija Vlorën  për një moment mendova  se do të ishte bukur t’i trajnoja pa pagesë menaxheren dhe vajzën me “rregulloren në vend të mendjes” për dallimin mes vlerës dhe fitimit.

Pastaj më erdhi ndër mend një shprehje  që po Vlora ma kishte mësuar:

Fisi – fis, rigoni nuk behet lis!

The post Dy modele mikëpritje dhe ndryshimi midis vlerës edhe maksimizimit të fitimit appeared first on Fast News Economy.

Por a është kjo ecuri që lidhet me sezonin turistik? Kjo duke pasur parasysh se korriku është kulmi i sezonit, me numrin e madh të turistëve të huaj dhe emigrantëve që kthehen në atdhe për pushime. Rrjedhimisht, kjo çon në rritje të kërkesës për produkte ushqimore, për karburante, që është lënda bazë e transportit, si dhe për akomodim, duke ushtruar presion në rritjen e çmimeve.

“Zhvillimi i turizmit nuk ka ndikuar vetëm në rritjen e vetvetes, por edhe në rritjen e sektorëve të tjerë që kanë lidhje direkte dhe indirekte me turizmin. Shqipëria, për shkak të diversitetit turistik, është kthyer e tëra në një atraksion turistik duke zhvilluar ekonominë lokale. E parë në aspektin mikro, ky sektor ka ndikuar edhe në rritjen e punësimit dhe zhvillimit të bizneseve të vogla, duke krijuar një stabilitet financiar në buxhetet familjare. I gjithë ky zhvillim ka ndikuar në rritjen e fuqisë blerëse nga turistët, por edhe nga vetë qytetarët shqiptarë për shkak të rritjes së të ardhurave të disponueshme. Rritja e fuqisë blerëse ka shkaktuar një rritje të lehtë të çmimeve, por kjo rritje është financiarisht e shëndetshme”, shprehet Romina Radonshiqi, eksperte për ekonominë.

Ndërsa Eduard Gjokutaj, drejtues i qendrës studimore ALTAX argumenton se rritja e çmimeve në Shqipëri ndihet edhe më shumë, për shkak të mungesës së mekanizmave konkurrues në treg.

“Korriku shënon kulmin e sezonit turistik. Kërkesa e lartë për akomodim, transport, restorante dhe shërbime argëtimi shtyn çmimet lart. Në një ekonomi ku sektori prodhues është i dobët dhe shërbimet (veçanërisht turizmi dhe tregtia) dominohen, kjo kërkesë e përkohshme gjen hapësirë më të madhe për rritje çmimesh. Qiratë e banesave dhe dhomave të pushimit, shpesh në treg informal, reagojnë shpejt ndaj fluksit të turistëve. Transporti ndikohet nga lëvizja e madhe e njerëzve, ndërsa ushqimet e freskëta përballen me presione të përkohshme. Kjo është prirje e përsëritur çdo verë, por intensiteti i saj në Shqipëri lidhet edhe me mungesën e mekanizmave konkurrues që do ta zbutnin”, shprehet Gjokutaj.

Ekspertët e ekonomisë shpjegojnë se rritja e çmimeve dhe shtrenjtimi i kostos së jetesës gjatë verës ndodh edhe në vendet e tjera, kryesisht aty ku turizmi është i zhvilluar.

“Në vende të Evropës Jugore dhe Ballkanit (Greqi, Itali, Kroaci, Mali i Zi, Maqedoni e Veriut etj). inflacioni shfaq rritje sezionale gjatë verës për të njëjtat arsye: turizmi rrit kërkesën për strehim, ushqim dhe transport. Në Eurozonë dhe BE, çmimet e shërbimeve të lidhura me turizmin dhe energjinë shpesh rriten në korrik-gusht. Diferenca qëndron në shkallën: në ekonomi me strukturë më prodhuese dhe konkurrencë më të fortë, efektet sezionale zakonisht zbuten më shpejt. Në Shqipëri, kombinimi i informalitetit, konkurrencës së kufizuar dhe varësisë nga importet e bën këtë model më të theksuar”, thotë Gjokutaj.

“Rritja e çmimeve në muajin korrik është një   fenomen normal, sidomos në vende ku turizmi është i zhvilluar. Gjithashtu, duhet theksuar fakti që muaji korrik është muaji që individët pushojnë dhe shpenzojnë para, pasi përkojnë pushimet vjetore, gjë që rrit kërkesën për mallra dhe shërbime në të gjithë vendin”, argumenton Romina Radonshiqi.

Rritja e inflacionit është konsideruar një dukuri kalimtare edhe nga guvernatori i Bankës së Shqipërisë, institucioni që me ligj ka detyrimin e monitorimit të këtij treguesi.

“Inflacioni i çmimeve të konsumit shënoi një nivel mesatar prej 3.0% në tremujorin e dytë të vitit, duke ardhur në rritje nga vlera e tremujorit paraardhës. Megjithatë, rritja e inflacionit në vend ka qenë e përmbajtur dhe ky tregues vijon të jetë në linjë me pritjet tona. Kjo ecuri u diktua si nga ecuria e çmimeve në tregjet ndërkombëtare, në ngjashmëri me zhvillimet në ekonomitë partnere, ashtu dhe nga niveli i lartë dhe e i qëndrueshëm i kërkesës agregate në vend. Megjithatë, duke përjashtuar inflacionin e lartë të qirave, inflacion, i cili pritet të ketë natyrë kalimtare, presionet e brendshme mbeten në linjë me objektivin tonë të stabilitetit të çmimeve”, u shpreh guvernatori një javë më parë.

Banka e Shqipërisë ka parashikuar një objektiv prej 3% të inflacionit për këtë vit, nivel që pritet të arrihet, në rast të mosmaterializimit të risqeve që lidhen kryesisht me situatën gjeopolitike dhe konfliktet globale.

The post Rritja e çmimeve në korrik, ekspertët: Ndikim i sezonit turistik appeared first on Fast News Economy.

Shqipëria po përballet me rrezikun demografik, që nënkupton pakësimin e numrit të popullsisë, si pasojë e emigracionit të vazhdueshëm, por edhe rënies së lindjeve. Të dhënat e fundit të Institutit të Statistikave tregojnë se në në tremujorin e dytë të këtij viti, shtesa natyrore e popullsisë rezultoi pozitive me 218 lindje më shumë se vdekj. Numri i lindjeve në këtë periudhë rezultoi 5.083, duke shënuar një rënie me 3 % krahasuar me të njëjtën periudhë të një viti më parë.

Ndërkohë numri i vdekjeve për tremujorin e dytë 2026 është 4.865, duke shënuar një rënie prej 3,7 %, krahasuar me tremujorin e dytë 2025.

Për këtë periudhë, pesë qarqe të vendit regjistrojnë shtesë natyrore pozitive të popullsisë, ndërsa në shtatë qarqet e tjera shtesa natyrore e popullsisë është negative. Qarku me shtesën natyrore më të lartë është Tirana me 1.033 lindje më shumë sesa vdekje, ndërsa qarku me shtesën natyrore më të ulët është Korça me 265 vdekje më shumë sesa lindje.

Problemet demografike nuk janë një dukuri vetëm shqiptare. Pasi edhe vendet e tjera të rajonit po përballen me një rrezik të tillë, kryesisht për shkak të emigrimit.

LINDJET

Në tremujorin e dytë 2026, nëntë qarqe të vendit regjistrojnë rritje të numrit të lindjeve, ndërsa tre qarqe të tjera shënojnë ulje, në krahasim me tremujorin e dytë të vitit 2025. Qarku Tiranë paraqitet me numrin më të lartë të lindjeve, duke regjistruar 2.310 lindje, ndërsa qarku Gjirokastër paraqitet me numrin më të ulët me 66 lindje. Qarku Dibër regjistron rritjen më të lartë në përqindje të lindjeve me 14,6 %, ndërsa rënien më të theksuar e regjistron qarku Tiranë me 12,0 %, krahasuar me tremujorin e dytë 2025.

VDEKJET

Në tremujorin e dytë 2026, tre qarqe të vendit regjistrojnë rritje të numrit të vdekjeve, ndërsa nëntë qarqe të tjera shënojnë ulje, në krahasim me tremujorin e dytë të vitit 2025. Numri më i lartë i vdekjeve është regjistruar në qarkun e Tiranës me 1.277 raste, ndërsa numri më i ulët në qarkun e Kukësit me 97 raste. Qarku Durrës regjistron rritjen më të lartë në përqindje të vdekjeve me 10,4 %, ndërsa rënien më të theksuar e regjistron qarku Kukës me 22,4 %, krahasuar me tremujorin e dytë 2025.

The post Rreziku demografik, numri i lindjeve në rënie edhe në tremujorin ne dytë të 2026 appeared first on Fast News Economy.

Bankat u zgjeruan me shpejtësi, ndërsa televizionet u përballën me rritje të ulët të të ardhurave për shkak të tregut të vogël të reklamave, madje TV e lajmeve janë në përgjithësi me humbje.

Kjo bëri që diferenca në paga të thellohej. Vitet e fundit, televizionet nuk po hapin më as vene të reja pune, që dikur ishte një nga faktorët kryesor që nxiti rritjen e pagave për shkak të kalimit të punonjësve nga një redaksi në tjetrën dhe hapjes së televizioneve të reja.

Por, cilat janë televizionet që kanë buxhetet më të mëdha për pagat e punonjësve të tyre. “Monitor” ka bërë një vlerësim, nisur nga buxhetet për paga e sigurime shoqërore, që televizionet kryesore kanë raportuar në bilancin e vitit 2025 dhe numrin e punonjësve.

Televizioni me buxhetin më të madh për pagat është “Top Channel”, me 824 milionë lekë, (gati 8.5 milionë euro), me rritje 2.3% me bazë vjetore. Televizioni kishte 447 punonjës në 2025-n, nga 465 në 2024-n, sipas të dhënave në raportet vjetore.

Paga mesatare mujore bruto për punonjës rezulton gati 154 mijë lekë, që është në këto nivele kryesisht për pagat e larta të niveleve drejtuese.

Top Channel i raporton fondet e pagave dhe sipas niveleve drejtuese. Për 52 drejtuesit e lartë, shpenzimet totale për paga dhe sigurime arritën në rreth 339.2 milionë lekë në vitin 2025. Kjo përkthehet në një pagë mesatare mujore bruto prej rreth 544 mijë lekësh për person.

Për 106 drejtuesit e nivelit të mesëm, fondi total i pagave dhe sigurimeve ishte rreth 200.3 milionë lekë, ose një mesatare mujore prej rreth 157 mijë lekësh për punonjës.

Për 275 punonjësit e kategorisë “staf tjetër”, shpenzimet për paga dhe sigurime arritën në rreth 282.4 milionë lekë, duke rezultuar në një mesatare mujore prej rreth 86 mijë lekësh për punonjës.

Top Channel ishte në 2025-n, televizioni i dytë më i madh në vend, me të ardhura prej 1.95 miliardë lekë dhe fitimet para taksave 242 milionë lekë.

Televizioni i dytë me fondin më të larta për pagat është “TV Klan”, me një buxhet  prej 660 milionë lekësh, ose gati 7 milionë euro, me rritje 7.5% me bazë vjetore.

Paga mesatare mujore bruto rezulton 131 mijë lekë për punonjës. Tv Klan ka një veçori, pasi emisione kryesore si “Opinion” apo e “Diela Shqiptare” funksionojnë si bërthama me NIPT më vete, ndaj pagat e drejtuesve të lartë nuk përfshihen në fondin e pagave të televizionit.

“TV Klan” është më i madhi në vend për të ardhurat, që arritën në 2.3 miliardë lekë në 2025-n, me rritje 3.2% me bazë vjetore dhe fitime 484 milionë lekë.

“News 24” kishte një buxhet pagash prej 267 milionë lekë, ndërsa raporton 170 të punësuar. Paga mesatare bruto për të punësuar rezulton rreth 130 mijë lekë.

Ky televizion është i vetmi që raporton dhe shpenzime për pensionet. “News 24” ka raportuar rritje të të ardhurave me 6%, në 274 milionë lekë në 2025-n. Televizioni i lajmeve ka deklaruar humbje prej 114 milionë lekësh.

“Vizion Plus” është televizioni me buxhetin e katërt më të madh për paga, në nivelin e 251 milionë lekëve, me rritje 12% me bazë vjetore. Televizioni raportoi 190 të punësuar në 2025-n, nga 187 vitin e mëparshëm.

Paga mesatare mujore bruto për të punësuar është 106 mijë lekë. “Media Vizion” (Vizion Plus)  raportoi të ardhura prej 655 milionë lekë, pothuajse në të njëjtin nivel me vitin e mëparshëm, dhe fitime minimale prej 25 milionë lekësh.

“ABC News” kishte fond pagash prej 187 milionë lekësh në 2025-n, me një rënie prej gati 23%. Kompania nuk e ka të deklaruar në bilanc numrin e punonjësve.  “ABC News” raportoi rritje të ardhurash me 29%, në 376 milionë lekë, në 2025-n dhe deklaroi për herë të parë një fitim prej 85 milionë lekësh.

“Report TV” kishte një buxhet për pagat prej 193 milionë lekësh në 2025-n, me rritje 8%. Operatori kishte 145 të punësuar, që do të thotë një pagë mesatare mujore bruto prej 111 mijë lekësh. “Report TV” (MTSC) deklaroi të ardhura prej 309 milionë lekë, me rritje 6%. Televizioni raportoi humbje prej 18 milionë lekësh.

“Euronews” deklaroi fond pagash prej 193 milionë lekë, me tkurrje prej 11.5% me bazë vjetore. Nuk ka të dhëna për numrin e punonjësve. “EuroNews” ka deklaruar të ardhura prej 185 milionë lekë, ndërsa vijon të jetë me humbje (109 milionë lekë).

“MCN TV” kishte një fond pagash prej 101 milionë lekësh, me rritje 18% me bazë vjetore. Nuk deklarohet numri i punonjësve. Qarkullimi vjetor në 2025-n ishte 72 milionë lekë, me tkurrje prej rreth 33%, ndërsa vijon të deklarojë humbje, që arritën në 49 milionë lekë./ Monitor

The post Televizionet që kanë fondet më të larta të pagave, sa paguhen mesatarisht gazetarët e TV appeared first on Fast News Economy.

“Një ndryshim tjetër është heqja e konvertimit të përfundimit të lejes së drejtimit të lëshuar nga shteti shqiptar me pagesën e një shume sa dyfishi i masës administrative maksimale, të parashikuar për normën e shkelur. Sqarojmë për këtë pikë; se nëse përpara datës 7 gusht një drejtues mjeti i evidentuar i kapur me shkelje të një norme dispozite të kodit rrugor ku përveç masës administrative në vlerë monetare parashikon edhe masën plotësuese të pezullimit të lejë së drejtimit, me ndryshimet e fundit ndërkohë që kishte mundësinë opsioni për të paguar dyfishin e vlerës maksimale të gjobës për mosaplikimin e masës plotësuese të pezullimit të lejes të drejtimit, kjo mundësi tashmë hiqet dhe leja e drejtimit pezullohet automatikisht për çdo normë të shkelur ku parashikohet pezullimi i lejes së drejtimit. Pra nuk është e mundur ose nuk është mundësia që një drejtues mjeti të paguajë dyfishin e gjobës në këmbim të mospezullimit të lejes së drejtimit”, bëri të ditur Vatoci.

Një tjetër ndryshim lidhet me përdorimin e telefonit celular gjatë drejtimit të mjetit. Nëse një drejtues konstatohet dy herë brenda të njëjtit vit, duke përdorur telefonin, parashikohet pezullimi i lejes së drejtimit.

“Një tjetër ndryshim është sanksionimi i përdoruesit telefonit celular edhe gjatë drejtimit të motomjeteve, biçikletave dhe monopatinave me motor. Në këtë dispozitë gjithashtu parashikohet pezullimi i lejes së drejtimit në rast se një drejtues mjeti është ndëshkuar dy herë brenda të njëjtit vit për përdorimin e aparatit celular nga tre që ishte për para miratimit të ndryshimeve në këtë ligj. Saktësojmë se përdorimi i telefonit celular gjatë drejtimit të mjetit rezulton një ndër shkaqet kryesore të humbjes së kontrollit me mjetin dhe për pasojë edhe për aksidentet rrugore me pasoja”.

Ndryshime ka edhe për drejtuesit e rinj, të cilët kanë marrë lejen e drejtimit gjatë 24 muajve të fundit, me kufizime të posaçme për shpejtësinë dhe drejtimin nën efektin e alkoolit.

Policia Rrugore thekson se masat synojnë parandalimin e shkeljeve dhe aksidenteve, ndërsa u bën apel drejtuesve të respektojnë kufijtë e shpejtësisë, të mos drejtojnë nën efektin e alkoolit dhe të shmangin manovrat e rrezikshme.

The post Ndryshimet në kodin rrugor, ja kur hiqet patenta përjetësisht appeared first on Fast News Economy.