Rrugët sot plot/ ‘Shpërthen’ gazetari i njohur: Të shfuqizohet karantina dhe çdo masë tjetër!

Dita e sotme ishte e dedikuar për nënat dhe fëmijët, të cilët kishim mundësi të dilnin deri në orën 11.00 të paradites.

Por mesa duket ky orar ka sjellë dhe mbipopullim nëpër rrugët e qyteteve të vendit.

E kjo gjë nuk u ka pëlqyer aspak njerëzve të cilët kanë vendosur të respektojnë karantinën dhe rregullat e vendosura prej më shumë se një muaji tashmë nga qeveria.

Një prej tyre është dhe gazetari i njohur Mentor Kikia, i cili shprehet se pas këtyre pamjeve në fundjavë, ku e shtuna është për të moshuarit dhe e diela për nënat me fëmijë, nuk ka më kuptim që të mbyllemi gjatë javës.

Ai shprehet se me këtë mbipopullim, nuk ka më vlerë as gjendja e emergjencës, as gjendja e jashtëzakonshme e as karantina.

Sipas tij mbyllja e mëtejshme nuk është më një masë parandaluese, por një eksperiment social.

REAGIMI I PLOTE I GAZETARIT MENTOR KIKIA

Karantina dhe çdo masë tjetër tashmë duhet shfuqizuar!

Nuk besoj(ende) se i gjithë ky makth që po heq njerëzimi është një plan shoqërish sekrete për të ndryshuar botën. As plan i “Masonëve” për të rrëzuar Donald Trumpin. As plan i Bill Gates për të seleksionuar njerëzimin. As plan korruptiv i OBSH-se në bashkëpunim me Kinën.
Por besoj se pas kësaj që ne bëjmë në fundjavë, është budallallëku më i madh të mbyllemi gjatë javës në shtëpi, apo të kufizojmë veprimet tona.
Jo, karantinimi nuk ka më asnjë kuptim!
Nuk e di nëse ia vlejti shkencërisht për të luftuar virusin, por tani karantinimi ka rënë si masë. Në fundjavë të gjithë dynden rrugëve e shesheve. Nëse nuk del burri, del gruaja në turmë, dhe nëse infekltohet ajo, e “ha” edhe burri në shtëpi, dhe po kështu edhe e anasjellta.
Ata që kishin liridaljen, mbushën bulevardet plot, sheshet plot, lulishtet plot. Të tjerë, që i përkasin oligarkisë shoqërore, vërshuan në bregdet, meqë policia nuk i ndalon.
Jo, as gjendja e emergjencës, as gjendja e jashtëzakonshme, as karantina e asgjë tjetër nuk kanë më asnjë vlerë “mjeksore”.
Mbyllja e metejshme nuk është më një masë parandaluese, por një eksperiment social.

Fotot jane te dites sotme, ne qytete te ndryshme.