Presidenti i SHBA Donald Trump ka bërë sërish një deklaratë shumë të fortë duke shigjetuar Kinën drejtpërdrejt në lidhje me COVID19.
Ai është shprehur se duan të dërgojnë hetues në Kinë për të zbuluar se si ka shpërthyer koronavirusi i ri, i cili është kthyer në një kërcënim të madh për botën.
Këto fraza numri 1 i Amerikës i bëri në një konferencë të përditshme për koronavirusin.
CNN raporton se SHBA ka bërë dhe më parë të tilla kërkesa, por Pekini zyrtar i ka kundërshtuar me forcë.
Shtëpia e Bardhë ka akuzuar vazhdimisht Kinën se ka fshehur informacionin e saktë në lidhje me shtrirjen e virusit brenda Kinës, rrjedhimisht ka fshehur edhe numrin real të viktimave.
“Ne po bisedojmë me Kinën. Ne iu kemi kërkuar atyre edhe para shumë kohësh që të mund të hetojmë në Kinë për virusin. Ne duam të hyjmë”, tha Trump gjatë konferencës. Pak ditë më parë presidenti i SHBA-ve njoftoi se i ka hequr fondet OBSH-së pasi sipas tij ka fshehur situatën reale në Kinë, dhe ka ndihmuar në përhapjen e virusit.
Nga ana tjetër dhe 3 shtete europiane, si Britania e Madhe, Franca dhe Gjermania kanë drejtuar gishtin nga Kina, që sipas tyre ka gënjyer gjithë botën për numrin e vdekjeve.
