“Rënie e domosdoshme” Albin Kurti flet për herë të parë pasi i rrëzuan qeverinë: 80 deputetë rrezikuan jetën e qytetarëve

Pas rrëzimit të qeverisë së tij mbrëmjen e djeshme nga Kuvendi i Kosovës,  kryeministri në detyrë Albin Kurti ka folur për herë të parë.

Ai shprehet se kjo ishte e domosdoshme për ngritjen e nevojshme që do të bëhet në të ardhmen.

Kurti shkruan se mocioni i mosbesimit kishte për qëllim dobësimin e qeverisjes, porosi kjo sipas tij nga ambasadori i SHBA, Grenell.

REAGIMI I PLOTE I ALBIN KURTIT

Ishte kjo një rënie e domosdoshme për ngritjen e nevojshme. Pa rënë qeveria si përbërje nuk bëhet dot qeverisja si përmbajtje. Jo se e kemi ditur, gjithsesi e morëm vesh. Mbledhja e djeshme e kuvendit do të ishte mirë të mbahej mend gjatë. Mirëpo, nuk do të ndodhë kështu, sepse ne do të fitojmë. Pra, e ardhmja është e jona, ndërkohë që do ta humbim një tragjedi.

Ky kuvend nuk e beson këtë qeveri sepse i nënshtrohet qeverisë si të tillë. Qeveria jonë nuk e beson këtë kuvend sepse e dashuron kuvendin si të tillë. Saktë e kishte thënë mbrëmë Prof. Enver Hasani: mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë. Qëllimi i mosbesimit nuk ishte rrëzimi i qeverisë sa dobësimi i qeverisjes.

Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial. Do të vazhdojmë si qeveri në detyrë. Jemi qeveri me detyra dhe jo qeveri e detyruar. Para së gjithash, duhet ta luftojmë bashkë pandeminë Covid-19. Mbi të gjitha, le t’i rrimë popullit afër se Kosova është shtëpia jonë.