Një nga masat më të marra nga të gjitha shtetet e botës për të frenuar përhapjen e koronavirusit, padyshim është izolimi në shtëpi, ku askush nuk duhet të dalë jashtë dhe të minimizojë kontaktet.
Ndërkohë Organizata Botërore e Shëndetësisë bën thirrje se kjo masë nuk do të mjaftojë për të frenuar COVID19, pandeminë që po rrezikon botën.
“T’u kërkosh qytetarëve të qëndrojnë në shtëpi, e të ndalosh lëvizjen e popullsisë, do të thotë të blesh kohë e të reduktosh trysninë ndaj sistemit shëndetësor. Por këto masa nuk mjaftojnë për të shuar pandemitë”, tha drejtuesi i OBSH, Tedros Adhanom.
Kjo organizatë rekomandon që shtetet të zgjerojnë, trajnojnë dhe fuqizojnë resurset e kujdesit shëndetësor dhe shëndetit publik, dhe të shtojë testet.
“Hapet një dritare të dytë mundësish. Pyetja është: si do ta shfrytëzoni atë? Në rekomandojmë 6 hapa: Fillimisht, zgjeroni e trajnoni resurset shëndetësore dhe së dyti implementoni një sistem për zbulimin e çdo rasti të dyshuar.
Së treti, rrisni kapacitetin prodhues dhe aftësinë për të testuar. Së katërti, identifikoni e përshtasni strukturat që do të përdorni për të trajtuar dhe izoluar pacientët.
Së pesti, zhvilloni një plan të qartë për karantinimin e personave që kanë pasur kontakt me të prekurit. Së fundmi, rifokusoni të gjithë qeverinë në luftën kundër Covid-19”, thuhet në një njoftim zyrtar.