Kryeministri Edi Rama ka vijuar me deklaratat përsa i përket masave që ai do të marrë në lidhje me situatën e krijuar nga koronavirusi.
Ai ka folur përpara pak minutash në një lidhje telefonike me Neës 24, ku është pyetur se a do të mbështesë shteti biznesin e madh në këtë krizë që po kalon për shkak të alarmit nga virusi i rrezikshëm.
Rama është përgjigjur se bizneset e mëdha nuk duhet ta konsiderojnë shtetin si bankë dhe këtë vit duhet të heqin dorë nga makinat e shtrenjta dhe nga pushimet e luksit sepse edhe ashtu jetohet shumë më mirë.
“Do ruajmë dhe detin që bëhet kos. Duke dëgjuar propozime të papërgjegjshme, kërkesa pas kërkesash, nga komuniteti i biznesit. Dua t’u them të gjithëve se deti nuk është bërë kos, por jemi këtu për të kursyer dhe kosin që kemi. Sepse jemi në luftë. Në një luftë të mirëfilltë që quhet e tillë dhe nga lider më të mëdhenj të botës.
Presidenti i SHBA flet për luftë, i Francës po ashtu. Jemi në luftë. Nëse do të ishte forma e luftës me të cilën jemi mësuar nga tv apo eksperienca jonë në rajon dhe nga vet eksperienca në 99 kur njerëzit iknin nga Kosova, se i kishin bombat mbi krye, s’do bënim pyetje për këtë kohë dhe të bënin kërkesa absurde për një kohë luftë.
Duke i kërkuar qeverisë nënë e babë. Jo qeveria ka detyrë tu gjendjet pranë të gjithëve, të shoh ata që janë më të dobëtit. Ata që rrinë në shtëpi dhe më të drejtë ankohen e janë të stresuar, le të kujtohen se pak km larg tyre rrinë në çadër, ka pensionistë të vetmuar. Ne kurrë s’do të bëjmë gjëra që mund të lezetojnë sot dhe kthehen nesër në një bumerang me pasoja të pallogaritshme.
Bizneset e mëdha të mos e shohin shtetin si bankë. Shteti do t’i ndihmojë, por ata t’i harrojnë makinat e shtrenjta, pushimet e luksit nëpër vendet më të shtrenjta të botës. Nuk është bërë deti kos, e deti kos nuk do të bëhet, e as ato liqenet e tyre s’do t’i shohin… E dimë fitimin e tyre. E shoh të turpshme që ata njerëz që kanë ngritur biznese të mëdha të akuzohen e baltosen, por sot është koha që t’ju them se duhet të sakrifikoni për popullin shqiptar, dhe nëse pasojat e mos-sakrificës tuaj bien mbi popull, s’do të bëni biznes rehat.”, u shpreh Rama.