“Viktima nga koronavirusi në një dhomë me nënën time, dyshojmë se është prekur”/ Flet djali i pacientes në Durrës

Një nga djemtë e pacienteve të shtruara në spitalin e Durrësit, thotë se viktima nga Covid-19 ishte shtruar në dhomë me dy pacientë të tjerë. Në një komunikim me Report Tv, Shkëlqim Buzi shprehet se mamaja e tij ka qenë në një dhomë me viktimën dhe dyshon se mund të jetë infektuar me koronavirus.

Për këtë arsye, Shkëlqimi ka shprehur frikën se e ëma mund të jetë infektuar pasi ka kollë të vazhdueshme. Buzi ka thënë se kanë qenë tre pacientë të tjerë në dhomë, ndërsa ka shtuar se vetëm nënës i kanë marrë mjekët analizat, ndërsa atij jo.

“Jam izoluar. Vetëm nënës i kanë marrë analizat, mua jo edhe pse i kërkuam. Nuk e çan njeri kokën që të interesohet. Unë edhe kam lëvizur, kam shkuar në punë, kam ardhur në shtëpi. Jemi njerëz të gjallë. Tani presim analizat e mamit. Unë mesa kam mundësi po rri steril fare, po laj edhe oborrin me açe, çfarë të bëj më shumë? Kemi ndenjur 4 ditë aty. Ajo e mohoi edhe e fshehu. Zv.ministrja thotë se ka qenë dhoma vetëm, nuk i vjen turp asaj që thotë ashtu. Të më dali para ajo se ia tregoj unë. Nëna ime është 84 vjeçe. Viktima rrinte vetëm me oksigjen, sa ia hiqnin i binte të fikët. E pashë që ishte keq dhe e nxorra nga spitali”, u shpreh Shkëlqim Buzi.