LIGJET E BIZNESIT
Kryetari i PD Lulzim Basha me anë të një deklarate për mediat shprehet se mjekët në rastin konkret duhet që të pajiseshin me mjete urgjente, duke shtuar se qeveria duhet që të akordonte më shumë fonde dhe që të blejë pajisjet e reja për të zbardhur mirë rastet e njerëzve që bartin virusin.
“Të gjithë jemi dëshmitarë të ngjarjes tragjike sot, ku një grua e moshuar ka humbur jetën nga koronavirusi. Rasti është shqetësues dhe shtimi i rasteve të reja duhet të shërbejë që të rrisim vigjilencën. Duhet të ndiqen me rigorozitet masat për ndalimin e përhapjes së koronavirusit. Qeveria duhet që të pajisen me mjetet e duhura mjekët. Nëse të parët që goditen nga valët e infeksionit janë mjekët, kush do të kujdeset për qytetarët? I bëj thirrje qeverisë që të blejë pajisjet e reja për të zbardhur mirë rastet e njerëzve që bartin virusin. Shtetet europiane kanë vënë miliona, ndërsa ne pak para. Fondi 3.5 milionë euro nuk mjafton”, tha Basha.
Kryedemokrati Basha vazhdoi të hedhë akuza në drejtim të qeverisë, teksa u shpreh se qeveria vazhdon të bëjë propagandë dhe se ka kërkuar marrjen e masave për sistemin shëndetësor dhe për popullin.
“Mjekët detyrohen që të vetëkarantinohen. Shqetësimi është i madh sepse shumica dërrmuese e stafit nuk ka pajisjet minimale. Nëqendrat shëndetësore kushtet janë thuajse inekzistente. Nuk kanë faj mjekët, ata janë heronj. Duhet t’i pajisim mjekët urgjentisht me mjete. Nuk është koha për propagandë. Nuk është koha për propagandë, kur gjysma e Tiranës nuk ka ujë. Kam kërkuar marrjen e masave për sistemin shëndetësor dhe për popullin”, deklaroi Basha.
Ndërsa, shqetësime për situatën ka shprehur edhe një mjek që po përballet me situatën, Ilir Allkja, që tha se doktorët duhet të pajisen me patjetër me veshje speciale për çdo rast të dyshuar.
“Unë dhe kolegët e mi jemi të parët në vijën e luftës dhe po shërbejmë qytetarët. Unë jam në vetë-karantinë. Duhet të shkonim me veshje. Unë kam thirrje për zotin Skënder Brataj, që të jenë më të kujdesshëm ndaj personave që kanë koronavirusin. Ne duhet të punojmë të gjithë që sistemi shëndetësor të mos bjerë në kolaps. Ju lutem na vishni me veshje speciale për cdo rast të dyshuar. Veshja vlen shumë më pak sesa jeta jonë”, u shpreh mjeku.
