Kaosi politik/ Eurodeputetët nisin takimin me Bashën dhe Kryemadhin

Kaosi politik në Shqipëri dhe ecuria e zbatimit të reformave sa i takon hapjes së negociatave të anëtarësimit në BE këtë qershor kanë sjellë sot në Tiranë një delegacion të Parlamentit Europian.

Liderët e opozitës, Lulzim Basha dhe Monika Kryemadhi, do të takohen të parët me eurodeputetët, takimi ka nisur në orën 16:15 në selinë e Bashkimit Europian në Tiranë.

Më herët kreu i delegacionit dhe Eurodeputeti i Partisë Popullore, Tune Kelam i ka kërkuar qeverisë dhe opozitës që të zgjidhin këtë situatë me anë të dialogut konstruktiv.

“Ne dënojmë me forcë retorikën politike që nxit dhunën dhe i kërkojmë opozitës që të riangazhohet me jetën parlamentare. Qeveria dhe opozita duhet ta kapërcejnë këtë situatë nëpërmjet dialogut konstruktiv.”

Sipas agjendës, në 17:10, ata do të presin ministrin e Brendshëm Sandër Lleshaj, ndërsa një orë më pas do të vizitojnë Kryeministrin Edi Rama në zyrën e këtij të fundit.