“Tmerri i qytetarëve”/Arrestohen dy persona, vidhnin pasqyrat e makinave

Dy persona janë arrestuar nga policia pasi dyshohet se vidhnin pasqyrat e automjeteve të qytetit.

Sipas informacionit të policisë së Vlorës, mësohet se janë ndaluar shtetasit D.S dhe R.H 24 vjeç dhe 28 vjeç të cilët banonin në Vlorë.

Këta shtetas dyshohet se ditën e djeshme në lagjen “Pavarësia” në Vlorë kanë vjedhur pasqyrat e dy automjeteve në pronësi të shtetasit A.L, duke i shkaktuar dëmin prej 15.000 lekë të rinj.

Njoftimi i Policisë:

Finalizohet operacioni i koduar “Mirror”

Policia ka arrestuar 2 shtetas, pasi dyshohet se vidhnin pasqyrat e automjeteve në qytet.

Specialistët për hetimin e krimeve, në bazë të informacioneve të marra në rrugë operative për vjedhjen e pasqyrave të mjeteve të markës “Mercedes”, menjëherë kanë organizuar punën me qëllim identifikimin dhe kapjen e autorëve.

Në kuadër të këtij operacioni, u bë kapja dhe ndalimi i shtetasve D.S dhe R.H (24 dhe 38 vjeç) me banim në Vlorë, të cilët dyshohen se ditën e djeshme në lagjen “Pavarësia” Vlorë kanë vjedhur pasqyrat e një automjeti mercedes, në pronësi të shtetasit A.L, duke i shkaktuar dëmin prej 15.000 lekë të rinj.

Nga hetimet e kryera, këta shtetas në bashkëpunim me njëri-tjetrin, më datë 28.02.2020, në lagjen “Isa Boletini” Vlorë dyshohet se gjatë orëve të para të mëngjesit të kenë vjedhur pasqyrat e automjeteve mercedes në pronësi të shtetasve D.H., Dh.A., A.L dhe O.H.

Gjithashtu, më datë 08.02.2020, në lagjen “Pavarësia 3” dyshohet të kenë vjedhur pasqyrat e mercedesit në pronësi të shtetasit Y.G (dëmi 12.000 lekë).

Dëmi i shkaktuar i 5 automjeteve në total arrin vlerën prej 127.000 lekë të rinj.

Materialet iu referuan Prokurorisë së Vlorës për veprime të mëtejshme.