Pas disa mesazheve të përhapura ditët e fundit në rrjetet sociale, ku thuhej se në Shqipëri janë konfirmuar 12 të prekur nga koronavirusi, Prokuroria e Tiranës ka nisur hetimet.
Alarmi u përhap pas një mesazhi zanor që një vajzë pretendonte se këtë situatë ja kishte treguar vjehrra e motrës së saj.
Menjëherë pas këtyre fjalëve, Prokuroria ka sqaruar se po verifikohen të gjitha informacionet dhe ka bërë një paralajmërim të fortë duke thënë se këto raste do të dënohen.
Reagimi i plotë:
Prokuroria Pranë Gjykatës së Shkallës së Parë, Tiranë, duke marrë shkas nga të dhënat e ndryshme të bëra publike në media si dhe përhapja e mesazheve nëpërmjet telefonit, në lidhje me informacione të dyshuara si të rreme mbi përhapjen e mundshme të Coronavirusit, në vendin tonë, filloi kryesisht hetimin për veprën penale të “Përhapja e informatave të rreme që ngjallin panik”, parashikuar nga neni 267 i Kodit Penal.
Objekti i hetimit lidhet me situatën e krijuar si rezultat i hapjes së informatave për të cilat dyshohen se janë të rreme, për shkak të natyrës sensitive që paraqet përhapja e këtyre informacioneve në masën e gjerë.
Duke treguar impenjimin maksimal të prokurorisë, në trajtimin e rasteve të tilla, sjellim në vëmendjen e qytetarëve se çdo përhapje e informatave apo njoftimeve të rreme, me fjalë, me shkrim, apo me çdo mënyrë tjetër, me qëllim që të ngjallë një gjendje pasigurie dhe paniku tek njerëzit është penalisht e dënueshme.
